|
|
|
|
|
|
 |  |
 |  |
روابط مفيدة : للإعلان بالموقع | استرجاع كلمة المرور| طلب كود تفعيل العضوية | تفعيل العضوية
 |
 |
 |
|
 |
||||||||
|
||||||||||
 |
 |
|||||||||
| منتدى فنون الطبخ يحتوي علي جميع انواع الاكلات وفنون الطبخ |
 |
|
|
أدوات الموضوع |
09-09-2009
|
رقم المشاركه : 41 |
|
|
عزومة 11 رمضان
عزومة 11 رمضان العصير عصير الليمون بالنعناع  المقادير:- • كوب مية كبير • ربع كوب عصير ليمون • 3 معالق سكر • 10 ورقات نعناع كبيرة مفرومة • أوراق نعناع "للتزيين" • شرائح ليمون"للتزيين" • مكعبات تلج الطريقة:- 1. اخلطي كل المقادير دي مع بعض، وبعد كده اضربيها في الخلاط. 2. صفّي العصير وصبيه في كوبايات العصير، وضيفي إليه مكعبات التلج، وزيني الكوبايات بشرائح الليمون وأوراق النعناع. طبق الشوربة شوربة كريمة عيش الغراب  المقادير:- • 2 مكعب مرقة الدجاج • 1 كوب عيش غراب مقطع شرائح • 2 كوب لبن كامل الدسم • 3 معالق كبيرة زبدة • 3 معالق كبيرة دقيق • معلقة كبيرة قشطة أو كريمة لباني • معلقة ملح + فلفل • 3 أكواب مية • معلقة بقدونس مقطع قطعاً صغيرة أو قطع مشروم "للتزيين" الطريقة:- 1. سيّحي معلقة الزبدة في حلة على نار هادئة، وبعد كده ضيفي إليها عيش الغراب، وقلبيهم مع بعض لغاية ما تلاقي إن عيش الغراب لونه ذهبي شيليه من على النار. 2. في حلة تانية سخني الزبدة وضيفي إليها الدقيق وقلبيهم مع بعض لغاية ما لون الدقيق يبقى ذهبي، ضيفي إليه اللبن بالتدريج مع التقليب المستمر علشان ما يكلكعش. 3. ضيفي إليهم مكعبات مرقة الدجاج والمية والملح والفلفل مع التقليب المستمر لمدة خمس دقائق أو لغاية ما الخليط يغلي، ضيفي إليه عيش الغراب وسيبيهم على النار لمدة خمس دقائق مع التقليب المستمر. 4. بعد مرور الخمس دقائق شيليه من على النار وحطيه في أطباق الشوربة وضيفي إليه معلقة البقدونس، والطبق ده ممكن يتقدم معاه عيش محمص. طبق السلاطة سلاطة الفاصوليا البيضاء  الطبق اللي معانا النهارده هو طبق سلطة الفاصوليا البيضاء.. المقادير:- • علبة فاصوليا بيضاء أو ربع كيلو فاصوليا • 1/2 كوب بقدونس مقطع قطعاً صغيرة • بصلة كبيرة • 3 معالق كبيرة عصير ليمون • 1/4 كوب زيت ذرة • ملح وفلفل الطريقة:- 1. لو مش حابة تشتري علبة جاهزة يبقى هاتي الفاصوليا وانقعيها في مية لمدة ساعتين، بعد كده اسلقيها في المية لمدة نص ساعة أو لغاية ما تلاقيها استوت. 2. بعد ما تستوي اغسليها وحطيها في مصفاة علشان تصفي المية اللي فيها، وبعد ما تبرد حطيها في التلاجة. 3. قبل الفطار بساعة خرجيها من التلاجة وحطيها في طبق السلاطة وقطعي معاها شرائح بصل وضيفي إليهم البقدونس والملح، والفلفل، وعصير الليمون والزيت وقلبيهم مع بعض كويس. الطبق الرئيسي صدور الفراخ بالسمسم والزبادي  المقادير:- • كيلو صدور فراخ • 1/2 حزمة بقدونس مقطعة قطعاً صغيرة • بصلة مقطعة قطعاً صغيرة • 5 فصوص ثوم مفروم • 1/4 كوب كبير طحينة • ملح وفلفل • كوب كبيرة زبادي • معلقة كبيرة سمسم (محمص) • 1/2 كوب كبير دقيق • 1/2 كبير بقسماط • زيت للقلي الطريقة:- 1. اغسلي صدور الفراخ كويس، وبعد كده حطيها في مصفاة، اعملي فتحات في صدور الفراخ بالسكينة زي اللي بتتعمل في السندويتشات. 2. اخلطي البقدونس مع البصل والثوم والطحينة والملح والفلفل وقلبيهم مع بعض كويس. 3. احشي صدور الفراخ بالخليط السابق اللي إنت عملتيه، واقفلي عليهم بأعواد خشبية (علشان الحشو ما يطلعش لبره). 4. غطي صدور الفراخ من جميع الجهات بالزبادي. 5. اخلطي السمسم المحمص مع الدقيق مع البقسماط كويس، وضيفي ليهم الملح والفلفل. 6. غطي صدور الفراخ بالخليط السابق من جميع الجوانب، وحطيها في التلاجة لمدة نص ساعة. 7. بعد مرور النص ساعة سخني الزيت كويس، وحمري فيه صدور الفراخ لغاية لونها ما يبقى ذهبي. 8. بعد ما تخلصي تحمير صدور الفراخ حطيها على ورق زبدة علشان يمتصّ الزيت الزائد. 9. بعد كده سخني الفرن على درجة حرارة متوسطة، ودخليها الفرن لمدة ربع ساعة، وبعد كده خرجيها وحطيها في أطباق التقديم، وزيني الطبق بأوراق البقدونس وعلى فكرة مع الطبق ده ممكن أنك تعملي طبق مكرونة بيضاء أو مكرونة بالصلصة.. طبق الحلو لقمة القاضي  المقادير:- • كوب دقيق • كوب لبن حليب • معلقة صغيرة خميرة • ذرة ملح • 1/4 زجاجة زيت ذرة الطريقة:- 1. اخلطي الدقيق مع الخميرة مع الملح، ضيفي إليهم تدريجياً اللبن وهو دافئ.. اعجني المقادير دي كلها مع بعضها كويس، وبعد كده غطيها وسيبيها لمدة 3 ساعات علشان تتخمر. 2. بعد مرور 3 ساعات سخني الزيت، وبعد كده خدي معلقة صغيرة من العجينة دي واقليها في الزيت، كرري الموضوع ده لغاية ما العجينة تخلص. 3. شيلي لقمة القاضي من الزيت، وحطيها وهي ساخنة في العسل أو الشربات، وبعد كده شيليها منه، وحطيها في مصفاة علشان تتخلص من العسل أو الشربات الزيادة. 4. رصيها في طبق الحلويات وضيفي إليها جوز الهند. ودي طريقة عمل شربات لقمة القاضي مقادير الشربات: • 1/2 كوب سكر • 3/4 كوب مية • عصير ليمونة • فانيليا طريقة عمل الشربات: حطي السكر والمية كلهم مع بعض في إناء على نار هادئة لمدة ربع ساعة.. بعد كده ضيفي الليمون وسيبيه لمدة 5 دقائق لغاية ما يغلي، وحطي الفانيليا وشيليه من على النار وسيبيه لغاية ما يبرد. وبكده تكون خلصت عزومتنا النهارده وياللا بسرعة على المطبخ علشان تلحقي تعمليها على الفطار وإلى اللقاء غداً إن شاء الله مع أطيب التمنيات بصوم مقبول وإفطار شهي بإذن الله سلااااااااام |
|
|
09-09-2009
|
رقم المشاركه : 42 |
|
|
عزومة 12 رمضان
عزومة 12 رمضان العصير عصير الجزر  المقادير:- • 1/4 كيلو جزر مقشر • 1/2 كوب سكر • كوب مية كبير • مكعبات تلج الطريقة:- هاتي الجزر واغسليه كويس، وبعد كده قطعيه إلى قطع صغيرة، وحطيه في الخلاط، وضيفي إليه السكر والمية واضربيهم مع بعض كويس، وبعد كده صفيه وحطيه في كأسات العصير وحطي معاه مكعبات التلج. طبق الشوربة شوربة الجرجير والبطاطس  المقادير:- • حزمة جرجير • 2 حبة بطاطس • مكعب مرقة الدجاج • 4 أكواب ماء • معلقة ملح • معلقة فلفل • معلقة كمون • 3 فصوص ثوم مفرومين الطريقة:- 1. حطي المية في حلة وحطيها على النار وسيبيها لغاية ما تغلي، وبعد كده ضيفي إليها مكعب مرقة الدجاج. 2. في الوقت اللي المية بتغلي فيه قشري البطاطس، واغسليها وقطعيها إلى مكعبات صغيرة، وضيفيها إلى المية مع مرقة الدجاج. 3. اغسلي الجرجير وقطعيه، وضيفيه إلى البطاطس، وضيفي إليهم الملح والفلفل والكمون. سيبيهم على النار لمدة ربع ساعة أو لغاية ما تلاقي إن الجرجير والبطاطس استوت اطفي البوتاجاز وسيبيها لغاية ما تبرد. 4. هاتي الخلاط وحطي فيه الخليط السابق واضربيه في الخلاط كويس، وبعد كده حطيه على النار مرة أخرى علشان يغلي. 5. أثناء ما بيغلي هاتي الثوم المدقوق وحمّريه في الزبدة، وضيفيه إلى الشوربة، بعد كده حطي الشوربة في أطباق الشوربة. طبق السلاطة سلاطة الكسبرة خضراء  لو جرّبتي طبق السلاطة ده مرة مش هتنسيه وهتحبي إنك تعمليه على طول مع كل أكلة سمك وعلى فكرة الطبق ده بسيط جداً. المقادير:- • حزمة كسبرة خضراء مقطعة قطعاً صغيرة • 2 فصوص ثوم مفرومين • 3 حبات طماطم مقطعة قطعاً صغيرة أو طماطم صغيرة سليمة • خيارة مقطعة قطعاً صغيرة • عصير ليمونة • معلقة صغيرة خل • بصلة صغيرة مقطعة قطعا ًصغيرة • ملح • معلقة صغيرة شطة • زيت زيتون الطريقة:- اخلطي كل المكونات دي مع بعضها، وبعد كده حطيها في طبق السلطة. الطبق الرئيسي صينية السمك (على الطريقة المغربية)  بنكمل الوعد اللي وعدناكم بيه قبل كده بإننا نجيب لكم أكلات من مختلف بلاد العالم، والنهاردة بنقدم لكم طبق سمك من المغرب.. المقادير • كيلو سمك فيليه "هامور أو أي نوع إنت بتحبيه" • عصير ليمون • شرائح ليمون أو برتقال • زيت زيتون • كزبرة خضراء مفروم ناعم • بقدونس أخضر مفروم ناعم • كمون مطحون • كزبرة مطحونة • شطة حارة ناعمة • شطة حارة خشنة • ملح و فلفل • بطاطس • فلفل أخضر و أحمر مُقطع حلقات • فلفل أحمر حامي (اختياري) • صلصة طماطم • حلقات ليمون • شرائح زيتون بدون بذر الطريقة:- 1. اغسلي السمك كويس. 2. اخلطي عصير الليمون وزيت الزيتون والتوابل والكزبرة الخضراء والبقدونس مع بعض وتبلي بيهم السمك كويس. 3. اسلقي البطاطس وقطعيها إلى شرائح سميكة. 4. حطي حلقات البطاطس في الصينية، وبعد كده حطي السمك بالتتبيلة بتاعته، ومن فوقه حطي الفلفل الأحمر والأخضر والفلفل الحامي وصلصة الطماطم وحلقات الليمون وقطع من الزيتون والكزبرة الخضراء. 5. غطي الصينية وسيبيها على البوتاجاز لمدة نص ساعة علشان تستوي، وبعد كده دخليها الفرن لمدة نص ساعة أو لغاية ما وشها يحمرّ. 6. بعد مرور النص ساعة خرّجي السمك من الفرن؛ ممكن مع الطبق ده إنك تعملي طبق رز أبيض. طبق الحلو تشيز كيك بالمانجا  المقادير:- • 1 علبة بسكويت • 1/4 كوب زبدة • علبة جبنة بالكريمة • 6 معالق صغيرة جيلي بطعم المانجو • 3 حبات مانجو مقطعة قطعاً صغيرة • 1/2 كوب عصير برتقال • 1/2 كوب سكر • 2 معلقة كبيرة عصير ليمون • 2 كوب كريمة للخفق الطريقة:- 1. دقي البسكويت كويس لغاية ما يبقى ناعم، وضيفي إليه الزبد الطري وامزجيهم كويس مع بعض. 2. حطي البسكويت والزبدة في صينية مستديرة ذات جوانب متحركة (قطرها 20 سم)، واضغطي عليها بإيدك كويس علشان الخليط ينزل في قاع الصينية، وبعد كده حطي الصينية في الفريزر لمدة ساعة. 3. دوّبي بودرة الجيلي في عصير البرتقال، وحطيهم هما الاتنين على نار هادئة لغاية ما يذوب الجيلي تماماً مع التقليب باستمرار، وبعد كده اطفي البوتاجاز، وسيبي الجيلي لغاية ما يبرد. 4. اضربي الجبن مع السكر في وعاء باستخدام مضرب بيض كهربائي لغاية ما الخليط ده يبقى ناعم، وضيفي إليه عصير الليمون مع الاستمرار في الضرب لمدة دقيقة أخرى. 5. اخفقي الكريمة كويس باستخدام مضرب البيض وضيفي نص الكريمة المخفوقة إلى مزيج الجبن، وقلبيهم مع بعض كويس.. 6. هاتي قطع المانجو الصغيرة وضيفيها إلى الجبنة وضيفي عصير البرتقال وقلبيهم مع بعض كويس، وبعد كده صبي المزيج على البسكويت اللي إنت عملتيه، وسوّي السطح بظهر المعلقة وحطيه في التلاجة لمدة 7 ساعات، وبعد كده طلعيه من التلاجة، وزيّنيه بقطع المانجو، والباقي من الكريمة المخفوقة. وبكده تكون خلصت عزومتنا النهارده وياللا بسرعة على المطبخ علشان تلحقي تعمليها على الفطار وإلى اللقاء غداً إن شاء الله مع أطيب التمنيات بصوم مقبول وإفطار شهي بإذن الله سلااااااااام |
|
اخر تعديل قلب صادق 09-09-2009
في 02:24 AM.
|
|
|
|
|
09-09-2009
|
رقم المشاركه : 43 |
|
|
عزومة 13 رمضان
عزومة 13 رمضان العصير عصير المشمش المجفف باللبن  المقادير:- • 1/4 كوب لبن حليب • 1/4 كيلو مشمش مجفف • فنجان مية ساقعة • عصير ليمونة • 4 معالق سكر • مكعبات ثلج الطريقة:- اخلطي كل المكونات دي مع بعضها، واضربيها في الخلاط، صفّيها وصبيها في كوبايات العصير وضيفي إليها مكعبات التلج. طبق الشوربة شوربة الخضارالمشوي  المقادير:- • 1/4 كوب زيت • 1/4 قرع صغير مقشر ومقطع مكعبات • 3 جزرات مقطعة حلقات كبيرة • 1 ثمرة فجل أبيض مقطع مكعبات • حزمة كرات مقطعة قطعاً كبيرة • بصلة مقطعة أربع قطع • معلقة ورق لورو • معلقة زعتر • معلقة روزماري • 5 أكواب شوربة لحمة أو فراخ • ملح وفلفل • جبنة مبشورة "للتزيين" الطريقة:- 1. شغلي الفرن على درجة حرارة متوسطة. 2. اخلطي الزيت مع الخضراوات، ورشي عليهم الأعشاب اللي عندك، بعد كده رصي الخضراوات في صاج ودخليها الفرن لمدة ساعة إلا ربع أو لغاية ما تلاقيها استوت بس خدي بالك إنك تقلبيها من وقت للتاني. 3. بعد ما تلاقي إن الخضار استوى طلعيه من الفرن وحطيه في حلة فيها الشوربة على النار، وسيبيهم مع بعض لمدة ربع ساعة مع مراعاة التقليب من وقت للتاني. 4. بعد مرور الربع ساعة اطفي البوتاجاز وصبي الشوربة في طبق الشوربة. طبق السلاطة بابا غنوج  أكيد طبعاً كلنا بنحب سلاطة البابا غنوج؛ لأن طمعها لذيذ جداً، وعلى فكرة سلاطة البابا غنوج دي مفيدة جداً لأنها بتمد الجسم بكمية هائلة من الفيتامينات. المقادير:- • 1 حبة باذنجان رومي متوسطة الحجم • 3 معالق كبيرة طحينة • 3 معالق كبيرة زبادي • 3 معالق كبيرة عصير ليمون • 2/1 1 معلقة صغيرة ثوم مدقوق • 3 معالق كبيرة زيت زيتون أو ذرة • ملح وفلفل الطريقة:- 1- اشوي الباذنجان على صاج فوق نار متوسطة، وخدي بالك إنك تقلبي الباذنجان على الوجهتين علشان توزعي الشوي بالتساوي. بعد ما تلاقي الباذنجان اتشوى شيليه من على النار وسيبيه لغاية ما يبرد، وبعد كده قشّريه. 2- هاتي طبق واهرسي فيه الباذنجان بالشوكة. وبعد كده ضيفي إليه الطحينة والزبادي والثوم المدقوق واخلطيهم مع بعض كويس، وبعد كده ضيفي الملح والفلفل وعصير الليمون وقلبيهم تاني مع بعض. 3- بعد كده ضيفي على وش الباذنجان الزيت، ولتجميل الطبق ممكن إنك تحطي أوراق بقدونس وقطع من الزيتون الأسود. الطبق الرئيسي صينية اللحمة على الطريقة الهندية  النهارده الطبق بتاعنا من الهند وطريقته بسيطة جداً... المقادير:- • 2/1 كيلو لحم ضأن بدون عظم مقطعة مكعبات • 2 بصل مفروم • 1 معلقة طعام صلصة طماطم • ثوم وزنجبيل • 1 معلقة صغيرة زعفران • 4/1 كوب ماء ورد • معلقة طعام كاري • 1 معلقة صغيرة ملح • 5 حبات حبهان • 5 أعواد قرفة • 2 ثمرة بطاطس مقطَّعة قطعاً صغيرة • 2 ثمرة فلفل أحمر مقطعة شرائط رفيعة الطريقة:- دي ما فيش أبسط منها، كل اللي عليكي إنك تخلطي كل المكونات دي مع بعضها وتسيبيها مع بعضها لمدة خمس ساعات في الثلاجة، وبعد كده تحطيها في صينية ودخليها في الفرن لغاية ما تستوي وتحمر. طبق الحلو جيلي بالفواكه والبسكويت مغطى بالقشطة والشوكولاته  المقادير:- • فواكه مشكلة مقطعة إلى مربعات صغيرة • 4 علب جيلي (نوع واحد) • 3 علب بسكويت • علبة قشطة • شوكولاتة مبشورة • كأس من الكريمة المخفوقة الطريقة:- 1. هاتي الفاكهة اللي عندك وقطعيها إلى مكعبات صغيرة، وبعد كده رصيها في طبق البايركس. 2. فضي محتويات علب الجيلي في إناء كبير فيه 3 أكواب من الميّة المغلية على نار متوسطة الحرارة مع التقليب المستمر لمدة عشر دقائق، أو لغاية ما تلاقي إن الجيلي بدأ يتقل اطفي البوتاجاز. 3. صبي شوية جيلي فوق الفاكهة. 4. بعد كده هاتي البسكويت ورصيه فوق الفاكهة والجيلي، بعد كده صبي باقي الجيلي فوق البسكويت، بعد كده حطي الطبق ده في الثلاجة لمدة 4 ساعات أو لغاية ما الجيلي يتجمد. 5. هاتي علبة القشطة وعلبة الكريمة واخلطيهم مع بعض كويس، وطلعي الطبق من الثلاجة، وادهني وشه بخليط الكريمة والقشطة، وبعد كده رجعيه الثلاجة تاني لمدة ساعة. 6. بعد ما تلاقيه جمد خرجيه من الثلاجة وحطي على وش الطبق شوية فاكهة أو شوية شوكولاتة مبشورة. وبكده تكون خلصت عزومتنا النهارده وياللا بسرعة على المطبخ علشان تلحقي تعمليها على الفطار وإلى اللقاء غداً إن شاء الله مع أطيب التمنيات بصوم مقبول وإفطار شهي بإذن الله سلااااااااام |
|
|
|
09-09-2009
|
رقم المشاركه : 44 |
|
|
عزومة 14 رمضان
عزومة 14 رمضان العصير عصير الموز والجوافة باللبن  المقادير:- • 3 ثمرات موز • 3 ثمرات جوافة • كوب كبير لبن بارد • 1/2 كوب سكر • عصير ليمونة • مكعبات تلج الطريقة:- قطعي الموز مع الجوافة، مع مراعاة انك تشيلي بذرة الجوافة، حطي الموز مع الجوافة مع عصير الليمون مع اللبن مع السكر مع المية في الخلاط، واضربيهم مع بعض كويس، بعد كده صفي العصير كويس وصبّيه في كأسات العصير وضيفي إليه مكعبات التلج. طبق الشوربة شوربة بالخضار والفراخ والمشروم  المقادير:- • 1/4 كيلو صدور فراخ مقطعة قطعاً كبيرة ومسلوقة • 3 بصلات مقطعة قطع صغيرة جداً • 1 كوب لبن حليب • 3 أكواب شوربة فراخ • كوب دقيق • 1/4 كيلو مشروم مقطع شرائح • 3 ملاعق كبيرة زبدة • عصير ليمونة • 1/2حزمة بقدونس مقطعة قطعاً صغيرة • فلفل وملح • 3 أكواب خضار مشكل ومقطع مكعبات صغيرة (جزر - بسلة - بطاطس - جزر) الطريقة:- 1. سيّحي الزبدة على النار، وبعد كده ضيفي إليها البصل مع استمرار التقليب لغاية ما لون البصل يبقى ذهبي. 2. لما تلاقي إن لون البصلة بقى ذهبي ضيفي إليها الدقيق مع استمرار التقليب لمدة خمس دقائق أو لغاية ما الدقيق يحمرّ. 3. بعد مرور الخمس دقائق ضيفي إليه اللبن تدريجياً مع التقليب المستمر علشان الدقيق ما يكلكعش. 4. بعد كده ضيفي شوربة الفراخ مع استمرار التقليب لغاية ما تلاقي إن العجينة بقت متجانسة وسميكة ومش مكلكعة ضيفي إليها الخضار والمشروم. 5. سيبي الخليط علي النار لمدة ربع ساعة، وبعد كده ضيفي إليه عصير الليمون والبهارات والملح، وسيبيه على النار لمدة ربع ساعة كمان أو لغاية ما تلاقي الخضار والمشروم استوى اطفي البوتجاز، وحطي الشوربة في أطباق التقديم وزيّني الأطباق بالبقدونس. طبق السلاطة سلاطة البسلة على الطريقة الروسية  طبق السلاطة اللي معانا النهاردة هو طبق سلاطة على الطريقة الروسية... المقادير:- • 1/4 كيلو بسلة • 5 ثمرات بطاطس مسلوقة • حزمة فجل • زيتون أخضر • كرفس • ملح • معلقة مايونيز الطريقة:- اسلقي الخضراوات دي مع بعضها ما عدا الفجل بعد ما تسلقي الخضروات حطيها في مصفاة، وبعد كده ضيفي إليها الملح والمايونيز وحلقات الفجل، وقلبيهم مع بعض وحطيهم في طبق السلاطة. الطبق الرئيسي برياني الدجاج  كلنا أكيد بنتفرج على مسلسلات خليجية، وبنسمع اسم "برياني الدجاج "؛ فإيه رأيك لما تعمليه النهارده على السفرة. على فكرة الطبق ده طعمه حلو أوي... المكونات:- • بصلة مقطعة حلقات • قطع من الدجاج مخلي من الجلد والعظم • 5 فصوص ثوم مفروم ناعم • زنجبيل مفروم ناعم • شوربة دجاج • طماطم مقطعة حلقات • علبة زبادي • 3بيضات مسلوقة • 3 أكواب أرز بسمتي • معلقة زعفران • كوب لبن حليب • بهارات مطحونة عبارة عن (شطة - ملح - فلفل أسود - كمون - حبهان - قرفه - كسبرة - زنجبيل) • بهارات صحيحة (حبهان - ورق لورا - فلفل أسود - قرنفل - شمر - قرفة) الطريقة:- 1. تبّلي قطع الفراخ بالبهارات المطحونة وسيبيهم مع بعض لمدة ساعة علشان الفراخ تتبّل. 2. حطي شوية زيت في صينية على النار، وضيفي إليها البصل، وحمّريه لغاية ما لونه يبقى ذهبي. 3. بعد مرور الساعة ضيفي الفراخ إلى البصل مع التقليب المستمرّ، وبعد كده ضيفي إليه الثوم المفروم والزنجبيل المفروم وقلبيهم مع بعض كويس لمدة 20 دقيقة على النار، وبعد كده اطفي البوتاجاز. 4. بعد كده ضيفي إليهم الشوربة، ورصي من فوقه حلقات الطماطم، وضيفي إليه الزبادي وشوية كزبرة الخضراء. 5. اغسلي الأرز كويس وانقعيه لمدة نص ساعة في المية، وبعد كده اسلقيه في حلة على النار فيها مية مضاف إليه البهارات الصحيحة. 6. صفي الأرز من المية بعد ما تسلقيه وضيفيه فوق سطح البرياني، ومن فوقه حطي الزبادي، واغرسي فيه البيض المسلوق. 7. انقعي الزعفران في اللبن الحليب لغاية لون اللبن ما يبقى برتقالي، ورشي اللبن على سطح الأرز، وبعد كده ضيفي إليه قطع من الزبد فوق الوجه. 8. حطي الصينية في الفرن لمدة نص ساعة. بعد مرور النص ساعة خرّجيه من الفرن وحطيه في أطباق التقديم، وعلى فكرة ممكن أنك تُزينيه بالكزبرة الخضراء والكاجو أو اللوز المحمص. طبق الحلوموز بالكاراميل  المقادير:- • 2 معلقة كبيرة عصير ليمون • 1/3 كوب كريمة لباني • 1 معلقة كبيرة زبد • 3/4 كوب سكر بني • 1/2 كوب لوز مقشر ومقطع نصفين بالطول "للتزيين" • 1/2 كوب كريمة مخفوقة مثلجة • 4 حبات موز الطريقة:- 1- دوبي الزبدة في إناء متوسط فوق نار متوسطة، وبعد كده ضيفي إليها السكر وقلبيهم مع بعض كويس، وسيبيهم على النار لغاية ما يبقى لونهم ذهبي. 2- ضيفي إليهم الكريمة اللباني، وقلبيهم مع بعض باستمرار لغاية ما تلاقي إن الصوص بقى أملس.. اطفي البوتجاز، وسيبيه علشان يبرد.. وخدي بالك إن لو كان قوام الصوص شديد الكثافة يبقى ضيفي إليه معلقتين من اللبن وقلبيهم مع بعض. 3- قطعي الموز بالطول إلى نصفين وحطي كل نصفين في طبق وادهنيهم بعصير الليمون، وصبي فوقهم صوص الكاراميل وزينيه بالكريمة المخفوقه واللوز. وبكده تكون خلصت عزومتنا النهارده وياللا بسرعة على المطبخ علشان تلحقي تعمليها على الفطار وإلى اللقاء غداً إن شاء الله مع أطيب التمنيات بصوم مقبول وإفطار شهي بإذن الله سلااااااااام |
|
|
|
09-09-2009
|
رقم المشاركه : 45 |
|
|
عزومة 15 رمضان
عزومة 15 رمضان العصير عصير المشمش المجفف بالبرتقال  المقادير:- • 1/4 كيلو مشمش مجفف • كوب كبير عصير برتقال • 1/2 كوب سكر • كوب مية • 1/4 معلقة قرفة "للتزيين" الطريقة:- 1. هاتي المشمش واغسليه كويس، وبعد كده انقعيه في مية لمدة 5 ساعات، ضيفي إليه عصير البرتقال قبل أذان المغرب بربع ساعة، وحطيه هو والبرتقال والسكر في الخلاط واضربيهم مع بعض كويس. 2. صبي العصير في كأسات العصير وزيني وش الكأسات بالقرفة. طبق الشوربة شوربة الكرفس  ده بقى طبق شوربة في منتهى الجمال... المقادير:- • حزمة كرفس مقطعة قطعاً صغيرة • 4 بصلات خضراء مقطعة قطعاً صغيرة • 3 ثمرات طماطم مقطعة قطعاً صغيرة • فلفل اخضر مقطعة قطعاً صغيرة • بصلة مقطعة قطعاً صغيرة • كيس شوربة بصل "من السوبر ماركت" • ملح وفلفل اسود • أوراق خس "للتزين" الطريقة:- اخلطي جميع المقادير مع بعضها ماعدا أوراق الخس، واسليقها على النار لغاية ما تستوي، وبعد كده اطفي عليها، وسيبيها لغاية ما تبرد، وبعد كده اضربيها في الخلاط... وبعد كده حطيها في حلة وسخنيها على النار تاني بعد كده حطيها في أطباق الشوربة وزيني الطبق بأوراق الخس. طبق السلاطة سلاطة الطحينة بالخضراوات المشكلة  المقادير:- • 1/2 كوب طحينة • 3 حبات طماطم مقطعة قطع صغيرة • 1/2 كوب فاصوليا بيضا من السوبر ماركت "اختياري" • فلفل رومي ألوان • 1/2 كوب مية • 3 معالق خل • معلقة صغيرة ملح • معلقة صغيرة فلفل أسود • عصير ليمونة • 3 فصوص ثوم مفرومة ناعم • أوراق بقدونس مفروم "للتزيين" الطريقة:- 1. دوّبي الطحينة في المية وضيفي إليها الليمون أو الخل والثوم المفروم وقلّبيهم مع بعض. 2. قطعي الطماطم مكعبات صغيرة وضيفيها للطحينة، وضيفي إليها الملح وقلبيهم مع بعض. الطبق الرئيسي صينية السمك البلطي المحشي  المقادير:-
• كيلو سمك بلطي • بصلة كبيرة مقطعة قطعاً متوسطة الحجم • 3 قرون فلفل أحمر مقطعين قطعاً صغيرة • بقدونس وكسبرة وكرات مقطعين قطعاً صغيرة • زيت زيتون • بهارات سمك • ملح وكمون • نص راس ثوم مطحونة • بطاطا مقطعة مكعبات صغيرة • عصير ثلاث ليمونات • شرائح ليمون • جزر مقطع شرائح الطريقة:- 1. هاتي فصوص الثوم وقرن فلفل أحمر مقطعا قطعاً صغيرة، وحطيهم في الهون، ومعاهم الملح والكمون والبهارات، واطحنيهم كويس مع بعض، وبعد كده ضيفي إليهم الليمون وقلبيهم مع بعض. 2. هاتي السمك واغسليه كويس، وبعد كده ادهنيه من الخارج والداخل بالخلطة اللي إنتِ عملتيها وسيبيه لمدة نص ساعة علشان يتبّل كويس. 3. هاتي البصلة وقطعيها قطعاً صغيرة، وبعد كده تبليها بالملح والليمون، وضيفي إليها قرن فلفل مقطعاً قطعاً صغيرة والبطاطا والكسبرة والبقدونس والكرات، واخلطي كل الحاجات دي مع بعضها، واحشي بيها بطن السمك وراسه. 4. هاتي صينية الفرن وحطي فيها السمك، ودخليه الفرن، وسيبيه لغاية ما تلاقي إن السمك لونه احمرّ واستوى، طلعيه وحطيه في طبق التقديم، وزيّني الطبق بشرائح الجزر والليمون طبق الحلو أرز باللبن  المقادير:- • 3 أكواب رز • 3 أكواب لبن (حليب) • كوب نشا • معلقة صغيرة فانيليا • 6 أكواب ماء • 2 كوب سكر الطريقة:- 1. هاتي حلة متوسطة الحجم وحطي فيها 5 أكواب مية وحطيها على النار، وأثناء ما المية بتغلي هاتي الأرز واغسليه كويس، وبعد كده صفيه من المية اللي فيه. 2. بعد ما المية تغلي ضيفي إليها الأرز، ولما تلاقي الأرز بدأ يستوي ضيفي إليه السكر، وقلبيهم مع بعض كويس، وخدي بالك إنك في الوقت ده تخلي النار هادية علشان الأرز يستوي من غير ما يلزق. 3. بعد ما الأرز يستوي ضيفي إليه اللبن، وفي الوقت اللي اللبن والأرز بيغلوا هاتي كوباية مية، ودوبي فيها النشا وضيفيه تدريجياً إلى الأرز واللبن مع التقليب المستمر أولاً بأول، وضيفي إليه معلقة صغيرة فانيليا وماء الورد.. سيبيه على النار لغاية ما تلاقي إن الأرز قوامه بقى سميك، اطفي البوتاجاز وهاتي أطباق الحلويات وحطي فيها الأرز. 4. سيبي الأرز لغاية ما يبرد، وبعد كده زيني الأطباق دي بجوز الهند والزبيب. وبكده تكون خلصت عزومتنا النهارده وياللا بسرعة على المطبخ علشان تلحقي تعمليها على الفطار وإلى اللقاء غداً إن شاء الله مع أطيب التمنيات بصوم مقبول وإفطار شهي بإذن الله سلااااااااام |
|
|
|
09-09-2009
|
رقم المشاركه : 46 |
|
|
عزومة 16 رمضان
عزومة 16 رمضان العصيرعصير الأفوكادو بآيس كريم الفانيليا  المقادير:- • 3 ثمرات أفوكادو • 1/2 كوب سكر • 3 أكواب لبن • 1/2 كوب آيس كريم فانيليا • مكعبات تلج الطريقة:- قشري الأفوكادو وشيلي منه البذور، بعد كده قطعيه قطع صغيرة، حطي الأفوكادو في الخلاط وضيفي إليه باقي المقادير واضربيهم مع بعض كويس في الخلاط، بعد كده صبي العصير في كاسات العصير وضيفي إليه مكعبات التلج. طبق الشوربة شوربة كريمة الفراخ  المقادير:- • 1/2 كيلو صدور فراخ مخلية ومقطعة قطعا صغيرة • علبة زبادي • معلقة نشا • 3 ملاعق طحينة • 1/2 كوب زبدة • جزرة مقطعة قطعا صغيرة • 1/2 كوب حبوب الذرة (حسب الرغبة) "من السوبر ماركت" • 1/2 مكعب مرقة الدجاج • 3 أكواب مية الطريقة:- 1. اضربي الزبدة السايحة + مرقة الدجاج + الطحينة + النشا + الزبادي + 3 أكواب مية في الخلاط كويس. 2. حطي الخليط على النار لغاية ما يغلي مع التقليب المستمر، وبعد كده ضيفي إليه قطع الدجاج والجزر والذرة وسيبيه على نار هادية لمدة ربع ساعة أو لغاية ما تحسي إن الشوربة بقت ثقيلة ومتجانسة، بعد كده حطيها في أطباق الشوربة وضيفي إليها الفلفل الأسود وقطع التوست المحمر والليمون حسب الرغبة. طبق السلطة الثومية  المقادير:- • 4 فصوص ثوم مفرومين ناعم • 3 علب زبادي • 3 معالق مايونيز • 1/2 حبة بطاطس مسلوقة ومقشرة ومهروسة الطريقة:- اخلطي كل المقادير دي مع بعضها البعض وقلبيهم مع بعض كويس وبعد كده حطيهم في طبق السلطة. الطبق الرئيسي فتة الفراخ بالزبادي  كلنا طبعا عارفين فتة اللحمة العادية، بس الجديد اللي بنقدمه النهارده هو طبق فتة الفراخ وعلى فكرة الطبق ده شامي. المقادير:- • فرخة كاملة • 3 أكواب أرز • 5 خبز شامي • 2 معلقة كبيرة ثوم مدقوق • 1/3 كوب خل • زيت عباد الشمس للقلي • 7 علب زبادي • 2 معلقة كبيرة سمن بلدي • 1/2 كوب لوز • 1/2 كوب صنوبر • ملح وفلفل الطريقة:- 1. هاتي الفرخة واغسليها كويس وبعد كده اسلقيها، بعد ما الفرخة تستوي أخليها من العظم والجلد وقطعيها شرائح. 2. هاتي الأرز واغسليه، وبعد كده هاتي حلة وحطي فيها معلقة سمنة ومعلقة زيت وضيفي إليهم الأرز وقلبيه معاهم لمدة خمس دقائق.. بعد كده ضيفي إليه شوربة الفرخة. 3. أثناء ما الأرز بيستوي هاتي الخبز وقطعيه قطع متوسطة الحجم وحمريه في الزيت لغاية ما لونه يبقى دهبي وبعد كده حمصيه في الفرن. 4. سخني معلقة سمن فوق نار خفيفة وضيفي إليها معلقة كبيرة ثوم وقلبيهم مع بعض لغاية ما لون الثوم يبقى دهبي، ضيفي إليه الخل وسيبيه لغاية ما يغلي وبعد كده ضيفي إليه كوب مرقة فراخ وسيبيهم لمدة خمس دقائق على النار. 5. اخلطي الزبادي في طبق مع معلقة خل و1/2 معلقة ثوم وملح وفلفل وقلبيهم مع بعض وبعد كده حطيه في التلاجة. 6. هاتي اللوز واغليه في المية لمدة 1/4 ساعة وبعد كده قشريه وقطعيه إلى قطع صغيرة وحمري اللوز والصنوبر كل على حدة.. 7. هاتي طبق زجاجي وحطي فيه الخبز المحمر ومن فوقه حوالي 1/2 كوب من صلصة الخل والثوم وبعد كده حطي الأرز. 8. ضيفي قطع الفراخ إلى المتبقي من صلصة الخل والثوم وسخنيهم مع بعض على نار متوسطة لمدة دقيقة علشان الفراخ تتشرب من الصلصة، بعد كده حطيها فوق الأرز وحطي الزبادي ومن فوقه معلقة سمن ساخنة، ورشي على الطبق من فوق اللوز والصنوبر. طبق الحلو بلح الشام  المقادير:- • كوب مية • كوب دقيق • معلقة كبيرة زيت أو زبدة • 3 بيضات • ذرة ملح • زيت للتحمير • شربات • فانيليا ودي مقادير شربات بلح الشام:- • 1/2 كوب سكر • 3/4 كوب مية • عصير ليمونة • فانيليا طريقة عمل الشربات:- حطي السكر والمية كلهم مع بعض في إناء على نار هادئة لمدة نص ساعة. بعد كده ضيفي الليمون وسيبيه لمدة ربع ساعة أو لغاية ما تلاقي إنه بدأ يتقل شيليه من على النار وضيفي إليه شوية فانيليا وسيبيه لغاية ما يبرد. طريقة عمل بلح الشام:- 1. هاتي الدقيق وانخليه وبعد كده ضيفي إليه ذرة الملح. 2. بعد كده هاتي صينية وحطي فيها كوباية المية وضيفي إليها معلقة الزيت أو الزبدة وحطيها على النار، ولما تلاقي المية بدأت في الغليان ضيفي إليها الدقيق دفعة واحدة بس خدي بالك إنك تهدي النار وتقلبي بسرعة الخليط ده كله مع بعضه كويس علشان مايتجمعش العجين ويسيب أثر في الصينية. 3. بعد كده شيليه من على النار وسيبيه لغاية ما يبرد، وبعد كده حطي فيه بيضة وضيفي إليها رشة فانيليا وقلبيهم مع بعض كويس، وبعد كده حطي بيضة تانية وقلبيهم كويس، وحطي بيضة تالتة وقلبيهم كويس لغاية ما تلاقي العجينة لينة. 4. هاتي الصينية اللي هتقلي فيها وحطي فيها كمية كبيرة من الزيت وسخني الزيت، وبعد كده حطي العجينة اللي عندك في القمع المخصص لبلح الشام أو باستخدام ماكينة بلح الشام ولما الزيت يسخن اضغطي على الكيس علشان تنزل منه عجينة بلح الشام، نزلي من الكيس كل مرة عجينة بلح الشام فيه بطول عقلة الصباع، كرري العملية دي لغاية ما تلاقي العجينة خلصت. 5. سيبي بلح الشام في الزيت لغاية ما تلاقي لونه بقى دهبي بعد كده شيليه من على النار وحطيه في مصفاة علشان يتصفى منه الزيت. 6. سيبي بلح الشام لغاية ما يبرد وبعد ما يبرد حطيه في الشربات وبعد خمس دقائق شيليه وحطيه في مصفاة تانية علشان يتصفى منه الشربات، بعد كده حطيه في طبق التقديم ورشي عليه جوز الهند أو أي مكسرات عندك في البيت. وبكده تكون خلصت عزومتنا النهارده وياللا بسرعة على المطبخ علشان تلحقي تعمليها على الفطار وإلى اللقاء غداً إن شاء الله مع أطيب التمنيات بصوم مقبول وإفطار شهي بإذن الله سلااااااااام |
|
|
|
10-09-2009
|
رقم المشاركه : 47 |
|
|
عزومة 17 رمضان
عزومة 17 رمضان العصير عصير البرتقال بالمانجو  المقادير:- • 2 كوب عصير مانجو • 3 أكواب عصير برتقال • 1 كوب عصير أناناس • شرائح برتقال "للتزيين" • 1/4 كوب سكر • عصير ليمونة • مكعبات ثلج الطريقة:- اخلطي كل المقادير دي مع بعضها وقلبيها كويس، بعد كده صبيها في كاسات العصير وضيفي إليها مكعبات الثلج وشرائح البرتقال. طبق الشوربة شوربة اللحمة بالبروكلي والفاصوليا الخضراء  المقادير:- • 1/4 كيلو لحمة مقطعة قطعا صغيرة • بصلة متوسطة مقطعة قطعا صغيرة • 1/2 كوب كرفس مقطع قطعا صغيرة • 1/2 كوب بروكلي مقطع قطعا صغيرة • 1/2 كوب فاصوليا خضرا • 1/2 جزرة مقطعة قطعا صغيرة • معلقة كزبرة خضراء • معلقة ملح • رشة بهارات • معلقة زبد • كوب مية الطريقة:- 1. سخني الزيدة وشوحي فيها اللحمة لغاية ما تحمر وبعد كده ضيفي إليها الملح والبهارات والبصل وقلبيهم مع بعض، ضيفي إليهم الخضار والجزر والفاصوليا والبروكلي والكرفس وقلبيهم مع بعض لمدة خمس دقائق. 2. بعد مرور الخمس دقائق ضيفي إليهم المية، وسيبيهم على النار لمدة نص ساعة أو لغاية ما تلاقي أن الخضار واللحمة استوت بعد كده حطي الشوربة في أطباق الشوربة وضيفي إليها الكزبرة الخضراء. طبق السلطةالسلطة اليونانية  طبق السلطة اللي معانا النهارده من اليونان المقادير:- • 4 حبات طماطم • 2 حبة خيار • 1 حبة فلفل أخضر • 1 بصلة متوسطة • 1/2 علبة جبنة تلاجة • 1/2 رابطة خس • 2/1 كوب زيتون أسود منزوع البذر • 2 معلقة كبيرة زيت زيتون • عصير ليمونة • ملح وفلفل الطريقة:- 1. قطعي الطماطم إلى قطع طولية وقطعي الخيار والبصل والخس إلى شرائح وقطعي الفلفل الأخضر إلى مربعات وقطعي الجبنة إلى مكعبات صغيرة. 2. حطي الخيار، والطماطم والبصل والفلفل الأخضر، في طبق السلطة وضيفي إليهم الملح والفلفل وعصير الليمون ومعلقة زيت الزيتون وقلبيهم مع بعض. 3. ضيفي إليهم الجبنة والزيتون الأسود ومن فوقهم معلقة زيت الزيتون. الطبق الرئيسي لحم بتلو محشي فلفل وجزر  المقادير:- • 8 شرائح لحم بتلو • 1 حبة جزر كبيرة مبشورة • 1 حبة فلفل أخضر متوسط • 1/2 كوب زيت ذرة • ملح وفلفل الطريقة:- 1. هاتي البصل والفلفل الأخضر وقطعيهم إلى شرائط رفيعة بنفس شكل الجزر المبشور. 2. سخني الزيت في الطاسة وضيفي إليها البصل والجزر والفلفل وقلبيهم مع بعض لمدة 5 دقائق أو لغاية ما تلاقي إن الخضار بدأ يستوي. 3. حطي معلقتين كبيرتين من خليط الخضروات في أحد أطراف شريحة اللحم وبعد كده لفي شريحة اللحمة على الخضروات دي.. كرري نفس العملية مع باقي اللحمة وبعد كده رصيها في صينية للفرن.. 4. ضيفي إلى الصينية شوية زيت وحمري فيها لفائف اللحم على نار هادية.. 5. لما تلاقي إن اللحمة لونها بقي بني من جميع الجوانب ضيفي إليها 1/2 كوب مية وملح وفلفل وخلّي النار هادية وغطي الصينية وسيبيها لمدة 20 نص ساعة أو لغاية ما اللحمة تستوي وبعد كده رصّيها في طبق التقديم. طبق الحلو قطايف بالبلح  طبق الحلو اللي معانا النهارده هو طبق القطايف المحشوة بلح.. المقادير:- • كيلو قطايف • كيلو بلح • 1 معلقة صغيرة قرفة • 1/2 كوب زبدة • 1/2 كوب لوز مبشور ودي كمان طريقة عمل شربات القطايف. مقادير الشربات: • 1/2 كباية سكر • 3/4 كباية مية • عصير ليمونة • فانيليا طريقة عمل الشربات:- حطي السكر والمية كلهم مع بعض في إناء على نار هادئة لمدة ربع ساعة.. بعد كده ضيفي الليمون وسيبيه لمدة 5 دقائق لغاية ما يغلي وبعد كده حطي الفانيليا وشيليه من على النار وسيبيه لغاية ما يبرد. طريقة عمل القطايف:- 1. هاتي البلح وانقعيه لمدة 4 ساعات في المية وبعد كده شيليه من المية وقشريه وشيلي منه النوى وقطعي البلح إلى قطع صغيرة. 2. هاتي طاسة وحطيها على نار هادية ودوبي فيها الزبدة وبعد كده ضيفي إليها البلح وقلبيهم مع بعض كويس، وبعدين رشي القرفة واستمري في التقليب لغاية ما تلاقي إن البلح بدأ يدوب.. هاتي اللوز المبشور وضيفيه إلى البلح واستمري في التقليب لمدة عشر دقائق كمان وبعد كده ارفعي الخليط من على النار وسيبيه لغاية ما يبرد. 3. هاتي القطايف واحشيها بالخليط ده.. وخدي بالك إن الحشو ده يكون في وسط قرص القطايف.. اقفلي قرص القطايف بالضغط عليه بإديكِي، وخدي بالك إنك تتأكدي من عدم وجود أي حشو ظاهر. 4. سخني فرن البوتجاز وهاتي صاج للفرن وادهنيه بشوية زبدة ورصي فيه القطايف وادهني سطح القطايف بالزبدة. ودخليها الفرن لمدة 7 دقائق وبعد كده خرجي الصاج وقلبي القطايف على الوجه الآخر وادهني وشّها بالزيدة ودخليها الفرن مرة كمان لمدة 7 دقائق وبعد ما القطايف وشها يحمر خرجيها وصبي عليها الشربات.. وبكده تكون خلصت عزومتنا النهارده وياللا بسرعة على المطبخ علشان تلحقي تعمليها على الفطار وإلى اللقاء غداً إن شاء الله مع أطيب التمنيات بصوم مقبول وإفطار شهي بإذن الله سلااااااااام |
|
|
|
10-09-2009
|
رقم المشاركه : 48 |
|
|
عزومة 18 رمضان
عزومة 18 رمضان العصيرعصير جريب فروت  المقادير:- • عصير نصف حبة جريب فروت • 2 معلقة كبيرة عسل "اختياري" • معلقة صغيرة نعناع مفروم • عصير ليمونة • مكعبات ثلج الطريقة:- أضربي كل المقادير اللي عندك في الخلاط، صبي العصير في كأسات العصير وضيفي إليه مكعبات الثلج. طبق الشوربة شوربة لسان العصفور بالجمبري  المقادير:- • 1/2 كيلو مكرونة لسان عصفور • 1/2 كوب زيت ذرة • بصلة مقطعة قطعا صغيرة جدا • 3 فصوص ثوم مفروم • 1/4 كيلو جمبري صغير مقشر • 2 كوب مية • 2 ورقة لورو • عصير أربع ليمونات • 6 أعواد كرفس مقطع قطعا صغيرة • بهارات سمك + ملح وفلفل وكمون • قرن فلفل أحمر مقطع قطعا صغيرة الطريقة:- 1. هاتي فصوص الثوم وقرن فلفل أحمر مقطع قطعا صغيرة وحطيهم في الهون ومعاهم الملح والكمون والبهارات واطحنيهم كويس مع بعض، بعد كده ضيفي إليهم الليمون وقلبيهم مع بعض. 2. هاتي الجمبري واغسليه كويس وبعد كده رشي عليه الخليط السابق وسيبيه لمدة نص ساعة علشان يتبّل كويس. 3. شوّحي لسان العصفور في الزيت لغاية ما لونه يبقى ذهبي، بعد كده اطفي عنه البوتاجاز. 4. حمّري البصلة والثوم فى زيت الذرة، وبعد كده ضيفى إليهم الجمبري والمية المذاب فيها بهارات السمك. 5. اتركي الخليط في الحلة على النار مع إضافة ورق اللورا وأعواد الكرفس وعصير الليمون لمدة ربع ساعة وبعد كده اطفي البوتاجاز، وقبل أذان المغرب بربع ساعة حطي الشوربة في أطباق الشوربة. طبق السلطة سلطة الطحينة بالزبادي  طبق السلطة ده بقى حلو جدا جدا المقادير:- • 1/2 علبة زبادي • 4 معالق طحينة • نص حزمة بقدونس مقطعة قطعا صغيرة • 3 فصوص ثوم مهروسة ناعم • ملح وفلفل ورشّة بهارات صغيرة • 3 معالق مية سخنة الطريقة:- هاتي طبق السلطة وحطي فيه الطحينة وبعد كده ضيفي إليه المية والزبادي وقلبيهم بالمعلقة كويس، ضيفي إليهم الثوم والملح والفلفل والبهارات والبقدونس واستمري في التقليب لغاية ما تلاقي إن الطحينة بقت سايلة. الطبق الرئيسي بطاطس بالجمبري والكلماري  المقادير:- • كيلو باذجان رومي • 1/2 كيلو بطاطس • بصلة مفروم ناعم • 5 فصوص ثوم مفروم ناعم • 1/4 كيلو بروكلي • زيت زيتون • ملح و فلفل أسود • 1/2 كيلو جمبري متوسط الحجم • خليط من ( الريحان - البصل الأخضر عيدان أو روزماري) • 1/2 كيلو كلماري مقطع قطعا في حجم الجمبري • 1/4 كوب جبنة موتزاريلا • 1/2 كوب خليط من الدقيق والبقسماط • زيت للتحمير الطريقة:- 1. هاتي فصوص الثوم وقرن فلفل أحمر مقطع قطعا صغيرة وحطيهم في الهون ومعاهم الملح والكمون والبهارات واطحنيهم كويس مع بعض، وبعد كده ضيفي إليهم الليمون وقلبيهم مع بعض. 2. هاتي الجمبري والكلماري واغسليهم كويس وبعد كده اخلطي كل واحد لوحده بالخلطة اللي إنتِ عملتيها وسيبيهم لمدة نص ساعة علشان يتبّلوا كويس. 3. قطعي الباذنجان والبطاطس إلى مكعبات صغيرة وشوّحيهم مع البروكلي في الزيت لمدة ربع ساعة. 4. حطي شوية زيت زيتون في حلة وحطيهم على النار وبعد كده ضيفي إليهم البصل وقلبيهم مع بعض لمدة عشرة دقائق وبعد كده ضيفي إليهم الثوم وقلبيهم مع بعض على النار لغاية ما لونهم يبقى دهبي ضيفي إليهم الملح الفلفل. 5. بعد كده ضيفي إليهم الجمبري وقلبيهم مع بعض لغاية ما لون الجمبري يبقي برتقالي ضيفي ليه خليط من (الريحان - البصل ألاخضر عيدان أو روزماري). 6. قطعي الكلماري إلى قطع في حجم الجمبري وضيفيه إلى الجمبري وقلبيهم مع بعض لمدة ربع ساعة وبعد كده ضيفي إليهم الباذنجان والبطاطس وقلبيهم على النار لمدة عشرة دقائق. 7. بعد مرور العشر دقائق ضيفي إليهم عصير الطماطم وزيت الزيتون وقلبيهم على النار.. هاتي صينية فرن وحطي فيها كل الحاجات اللي فاتت ورصّي عليها من على الوش الطماطم والجبنة الموتزاريلا ورشي شوية دقيق وبقسماط وزيت الزيتون. 8. شغلي الفرن على درجة حرارة متوسطة ودخلي الصينية فيه لمدة نص ساعة أو لغاية ما وشها يحمر خرجيها وحطيها في أطباق التقديم.. طبق الحلو سلطة فواكه  أكيد بعد الوجبة الدسمة دي مش هتقدري تاكلي حلويات؛ فإيه رايك لما تستبدلي النهارده طبق الحلو بطبق سلطة فواكه. المقادير:- • 1 حبة تفاح • 5 حبات برتقال • 1 حبة كيوي • 1 حبة كمثرى أو جوافة • 1 حبة مانجو • 6 حبات فراولة • 6حبات عنب أخضر • 6 حبات عنب أحمر • عصير ليمونة الطريقة:- هاتي البرتقال واعصريه، قطعي التفاح والكيوي والكمثرى والمانجو والبرتقال مكعبات متوسطة الحجم، وقطعي الفراولة بالنصف.. اخلطي كل الحاجات دي مع بعضها وحطيهم في طبق كبير وضيفي إليهم عصير البرتقال وعصير الليمون. وبكده تكون خلصت عزومتنا النهارده وياللا بسرعة على المطبخ علشان تلحقي تعمليها على الفطار وإلى اللقاء غداً إن شاء الله مع أطيب التمنيات بصوم مقبول وإفطار شهي بإذن الله سلااااااااام |
|
|
|
10-09-2009
|
رقم المشاركه : 49 |
|
|
عزومة 19 رمضان
عزومة 19 رمضان العصير عصير البطيخ والفراولة  المقادير:- • 7 شرائح بطيخ مقطعة مكعبات صغيرة ومنزوع منها اللب. • كوب كبير مية. • 1/2 كيلو فراولة مقطعة قطع صغير. • مكعبات ثلج . • شرائح ليمون "للتزيين". • 1/2 كوب سكر. • 1/4 كوب فراولة مقطعة قطعا صغيرة. الطريقة:- أضربي شرائح البطيخ مع الفراولة والسكر والمية في الخلاط كويس، قبل أذان المغرب بربع ساعة صبي العصير في كاسات العصير وضيفي إليه شرائح الليمون وقطع الفراولة ومكعبات الثلج. طبق الشوربة شوربة الفلفل الأخضر  المقادير:- • 1/2 كيلو فلفل أخضر بارد مقطع قطع متوسطة الحجم • بصلة كبيرة مقطعة قطع صغيرة • 5 أكواب شوربة فراخ أو لحمة • 3 ملاعق كبيرة زيت الزيتون • ملح وفلفل الطريقة:- 1. سخّني زيت الزيتون على النار، وضيفي إليه البصلة المقطعة قطعا صغيرة مع التقليب المستمر لغاية ما لون البصلة يبقي دهبي. 2. بعد ما تلاقي إن لون البصلة بقي دهبي ضيفي إليها الفلفل المقطع والشوربة والملح والفلفل وسبيهم على النار لمدة نص ساعة. 3. بعد مرور النص ساعة اطفي البوتجاز، وسيبي الشوربة لغاية ما تبرد، وبعد كده اضربيها في الخلاط لمدة دقيقة، وصفيها بالمصفاة علشان تتخلصي من قشر الفلفل. 4. قبل أذان المغرب بربع ساعة حطي الشوربة على النار، وبعد كده حطيها في أطباق الشوربة. طبق السلطة سلطة بطاطس بالزيتون  المقادير:- • 4 حبات بطاطس مسلوقة • كوب زيتون أخضر مقطع شرائح • كوب زيتون أسود مقطع شرائح • عصير ليمونة • معلقة ملح وفلفل • 1/4 كوب زيت زيتون • خس مقطع شرائح رفيعة • 4 حبات خيار مقطعة مكعبات صغيرة • 3 حبات جزر مقطع مكعبات صغيرة • 3 حبات طماطم مقطعه مكعبات صغيرة الطريقة:- قطعي البطاطس مكعبات واخلطي كل المقادير مع بعضها كويس وتبّليهم بالملح والفلفل والليمون، وبعد كده حطيها في أطباق السلطة. الطبق الرئيسي صينية السمك بالبشاميل  أكيد أول ما تشوفي العنوان ده هتقولي إيه الكلام ده هو معقول فيه حاجة اسمها سمك بالبشاميل؟ هاقول لك آه طبعا في وعلى فكرة الطبق ده مليان بالعناصر الغذائية المفيدة جدا جدا للجسم .. المقادير:- • كيلو سمك فيليه • عصير خمس ليمونات كبيرة • 1/2 كوب كبير زيت عباد الشمس • 1/2 كوب كبير زبد • 1/2 كوب لبن حليب • 3 معالق صغيرة كمون • 1/2 كوب مكسرات "عين جمل + جوز مفروم+ لوز" • ملح و فلفل • 5 فصوص ثوم مفروم • قرن شطة حار مقطع مقطع قطع صغيرة • بيضة مخفوقة بالملح والفلفل • فنجان جبنه موتزاريلا الطريقة:- 1. تبلي السمك بالملح والفلفل والكمون وعصير الليمون والثوم وقرن الشطة الأحمر، وقلبيهم مع بعض كويس وسيبيه في الثلاجة لمدة ساعتين علشان يتتبل. 2. اسلقي اللوز لمدة 10 دقائق وبعد كده قشريه وقطعي كل لوزة إلى 4 قطع بالطول وبعد كده حمّصيه في الفرن أو التوستر أو في الزيت. 3. سيّحي الزبدة في حلة متوسطة الحجم وبعد كده، وضيفي إليها الدقيق مع التقليب المستمر لغاية لون الدقيق ما يبقي دهبي.. بعد كده ضيفي اللبن مع التقليب المستمر لغاية ما تلاقي إن الشكل بقى عامل زي الكريمة، وبعد كده ضيفي إليه الملح والفلفل والبهارات وبكده يبقى إنت عملتي البشاميل بعد كده اطفي البوتجاز وسيبيه علشان يبرد . 4. بعد ما البشاميل يبرد ضيفي إليه اللوز وعين الجمل وقلبيهم مع بعض كويس. 5. هاتي صينية فرن وادهنيها بالزيت ورصي فيها شرائح السمك، وبعد كده صبي فوقها البشاميل بالتساوي وبعدين وزعي الجبنة الموتزاريلا على الوش بالتساوي، وممكن أنك ترشي على وش الصينية زيت علشان لما تدخل الفرن تحمر وممكن أنك ترشي على الوش بيضة مخفوقة بالملح والفلفل. 6. سخني الفرن على درجة حرارة متوسطة ودخلي الصينية وسيبيها لمدة ساعة أو لغاية ما وشها يحمر وبعد كده خرجيها . طبق الحلو التفاح بالفواكه المجففة  المقادير:- • 1 كوب مشمش مجفف • 1 كوب قراصية منزوعة البذر • 8 حبات تفاح أصفر متوسط الحجم • 1/2 كوب عصير ليمون • كوب زبدة • 3 معالق كبيرة قرفة • 1/4 كوب سكر • 1/2 كوب زبيب الطريقة:- 1- قطعي المشمش والقراصية إلى قطع متوسطة الحجم وحطيهم في طبق واخلطيهم بالسكر وقلبيهم مع بعض كويس. 2- هاتي التفاح وشيلي قلبه مع الاحتفاظ بالتفاحة كاملة. 3- هاتي عصير الليمون وادهني التفاح من بره ومن جوه باستخدام فرشاة رفيعة. 4- ادهني صينية الفرن بالزبد ورصي فيها التفاح واقفا وحطي جوه كل تفاحة معلقة صغيرة من خليط السكر والمشمش والقراصية ورشي باقي الخليط في الصينية. 5- هاتي الزبدة وقطعيها إلى مربعات وحطيها على التفاح وفي الصينية. 6- سخني الفرن على درجة حرارة متوسطة ودخلي صينية التفاح في الفرن وسيبيها لمدة ربع ساعة أو لغاية ما تلاقي التفاح لونه دهبي طلعيه وحطيه في طبق التقديم. وبكده تكون خلصت عزومتنا النهارده وياللا بسرعة على المطبخ علشان تلحقي تعمليها على الفطار وإلى اللقاء غداً إن شاء الله مع أطيب التمنيات بصوم مقبول وإفطار شهي بإذن الله سلااااااااام |
|
|
|
05-08-2010
|
رقم المشاركه : 50 |
|
|
كل عام والجميع بخير اللهم ىمين |
|
|
| |
| مواقع النشر |
| العبارات الدلالية |
| رمضانية, ل30, وجبات, وجبة, يوم |
| أدوات الموضوع | |
|
|
المواضيع المتشابهه
|
||||
| الموضوع | كاتب الموضوع | المنتدى | مشاركات | |
| خطة بسيطة ... للتخلص من سموم الجسم في سبعة أيام | محمد فضل | صحتك بالدنيا | 1 | |
| استضافه مطار الخور بحضور نخبة من الهواة والمحترفين ...يوم الطيران المفتوح منصة مثالية | محمد فضل | منتدى الطائرات | 0 | |
أنت غير مشترك في حلم عابر. للتسجيل الرجاء اضغط هنـا
