|
|
|
|
|
|
 |  |
 |  |
روابط مفيدة : للإعلان بالموقع | استرجاع كلمة المرور| طلب كود تفعيل العضوية | تفعيل العضوية
 |
 |
 |
|
 |
||||||||
|
||||||||||
 |
 |
|||||||||
| منتدى فنون الطبخ يحتوي علي جميع انواع الاكلات وفنون الطبخ |
 |
|
|
أدوات الموضوع |
26-08-2009
|
رقم المشاركه : 1 |
|
|
وجبات رمضانية ... 30 وجبة ل30 يوم
 فى البداية أحب اقول للجميع كل عام وانتم بخير وسعادة وبعودة الأيام ورمضان كريم تقبل الله منا ومنكم صالح الأعمال باذن الله طبعا فى رمضان بتكون ست البيت مستعجلة ومتلخبطة ودايما محتارة يا ترى تطبخ ايه النهارده ؟؟؟؟!!!!!!!!!!!!! هنا وفى الموضوع ده هقدملك لك "كل يوم" وبأكد كلامي تاني "كل يوم" من أيام الشهر الكريم فكرة لوجبة إفطار كاملة شاملة "العصير + طبق السلطة + طبق الشوربة + الطبق الرئيسي + طبق الحلو"... يعني من الآخر كده هقدم لك وجبة كاملة فيها كل العناصر الغذائية اللي جسمك محتاجها واللي سفرتك محتاجاها علشان العزومة تكون شيك، وكمان ما تخدش وقت كبير منك في تحضيرها لأننا هنراعي إننا نختار أصناف سهلة علشان تقدري إنك تعمليها من غير أي مجهود أو تعب وكمان ما تاخدش وقت كبير منك لأن زي ما أنت عارفة إن اليوم في رمضان بيكون قصير قوي وهنراعي فيها إن مقاديرها تكون متوافرة ورخيصة وتناسب كل الناس وغير مرهقة لميزانية الأسرة ده غير أننا هنقدم لك أكلات جديدة من مختلف بلاد العالم يعني من الآخر كده معانا هتلاقي كل اللي أنت عايزاه ومش هتقدري ما تدخليش عندنا كل يوم.. يلاّ نشوف معانا إيه؟! ,[fhj vlqhkdm >>> 30 ,[fm g30 d,l g30 ,[fhj ,[fm |
|
اخر تعديل قلب صادق 26-08-2009
في 01:59 AM.
|
|
|
|
26-08-2009
|
رقم المشاركه : 2 |
|
|
عزومة 1 رمضان
عزومة 1 رمضان العصير قمر الدين بما أننا اخترنا أن يكون معانا في الأسبوع الأول من رمضان أكلات من المطبخ المصري، يبقى هتلاقي إن أهم حاجة بتميز السفرة المصرية في رمضان هو؛ وجود كأسات عصير قمر الدين على السفرة، ودي أبسط طريقة لعمل العصير.. المقادير:- • 1/2 لفة قمر الدين مقطعة قطعاً صغيرة • 1/2 كوب مشمش مجفف • 1/2 كوب سكر • 3 أكواب مية • مكعبات ثلج "اختياري" الطريقة:- انقعي قمر الدين والمشمش المجفف مع بعض أول ما تصحي من النوم في المية، وقبل أذان المغرب بنص ساعة ضيفي إليهم السكر والمية، واضربيهم مع بعض في الخلاط، وبعد كده صفّيهم بالمصفاة السلك، وصبي عصير قمر الدين في كأسات العصير وضيفي إليه مكعبات الثلج. طبق الشوربة شوربة الخضار بالشعرية  فيه بنات كتير مش بتحب إنها تاكل الخضار المطبوخ، ودي حاجة غلط جداً خصوصاً مع الصيام طول النهار... فإيه رأيك لما تتغلبي على المشكلة دي وتعملي طبق شوربة خضار، وعلى فكرة الطبق ده طعمه حلو جداً، وكمان خفيف على المعدة في رمضان ده؛ غير أنه هيفتح نفسك على الأكل، وهيعوّض جسمك عن نسبة السوائل اللي ممكن يفقدها بسبب الصيام، ودي أسهل طريقة لعمل شوربة الخضار... المقادير:- • 1/4 كيلو بسلة • 1/4 كيلو فاصوليا خضراء • 2 حبة جزر مقطعة مكعبات متوسطة الحجم • 2حبة بطاطس مقطعة مكعبات متوسطة الحجم • 2 حبة كوسا مقطعة مكعبات متوسطة الحجم • 1/2 كوب شعرية • معلقتين سمنة • معلقة ملح وفلفل • شوربة فراخ أو لحمة • مكعب مرقة دجاج "اختياري" • حزمة بقدونس مقطعة قطع صغيرة "للتجميل" • عصير ليمونة "اختياري" الطريقة:- 1- هاتي حلة صغيرة واسلقي فيها البسلة والفاصوليا، وبعد كده اغسليهم بالمية الباردة، وحطيهم في المصفاة علشان تتخلصي من أي مية ممكن إنها تكون موجودة. 2- هاتي الحلة اللي هتعملي فيها الشوربة، وحطي فيها معلقتين سمنة، وحطيها على النار، بعد كده ضيفي ليها الشعرية وقلبيها لغاية ما تحمرّ ويبقى لونها ذهبي. 3- هاتي باقي الخضروات وضيفيها للشعرية، واستمري في التقليب لمدة عشر دقائق، وبعد كده ضيفي إليهم "مكعب مرقة الدجاج" و"شوربة الفراخ أو اللحمة" وسيبيهم على النار لمدة ربع ساعة أو لغاية ما الشوربة تغلي، بعد كده هدي نار البوتجاز وسيبيها لمدة ربع ساعة أو لغاية ما تلاقي الخضار استوي اطفي البوتجاز، وقبل أذان المغرب بربع ساعة صبي الشوربة في أطباق الشوربة، وضيفي ليها البقدونس المقطع وعصير الليمون. طبق السلطة سلطة الزبادي  اخترنا لك النهارده طبق سلاطة الزبادي لأن ده أنسب حاجة للطبق الرئيسي اللي هنعمله النهارده ... المقادير:- • 3 فصوص ثوم مدقوق • علبة زبادي • ورقة نعناع جافّ أو أخضر • خيارة مقطعة قطع صغيرة جداً أو مفرومة • معلقة زيت ذرة • معلقة فلفل أسود + معلقة ملح + معلقة كمون الطريقة:- حطي علبة الزبادي فى طبق السلطة، وضيفي إليها الثوم المدقوق والخيار والملح والزيت والفلفل الأسود والكمون، وقلبيهم كلهم مع بعضهم كويس، وزيني أطراف الطبق بالنعناع أو رشي على الطبق أوراق النعناع. الطبق الرئيسي بط محشي فريك  البط من الأطباق المشهورة جداً في المطبخ المصري واللي كل المصريين بيحرصوا على وجوده على مائدة الإفطار في أول يوم رمضان، وفيه أكتر من طريقة لعمل البط بس إحنا النهارده اخترنا لك الطريقة دي... المقادير:- • 1/2 كيلو فريك • 1حبة طماطم مقطعة قطع صغيرة جداً • 2 معلقة كبيرة زبدة • 3 معالق كبيرة زيت عباد الشمس • 3 بصلات مقطعة قطع صغيرة • 3 حبات بطاطس مقطعة قطع صغيرة • ملح وفلفل وبهارات • 3 بصلات مقطعة شرائح • ورق لاورو • 3 أكواب مية دافية • 1كوب كبير دقيق • عصير ليمونة الطريقة:- 1- هاتي الفريك واغسليه كويس وبعد كده حطيه في المصفاة. 2- هاتي حلة وحطي فيها الزبدة والزيت وحطيهم على النار لغاية ما يسخنوا، وبعد كده ضيفي إليهم الفريك مع التقليب المستمر لغاية ما الفريك لونه يبقى ذهبي. 3- لما تلاقي إن الفريك لونه بقى ذهبي ضيفي إليه الطماطم المبشورة والبصل والبطاطس والملح والفلفل والبهارات، وشوحيهم على النار لمدة 10 دقائق مع التقليب المتسمر بس خدي بالك إن النار تكون هادية. 4- هاتي البطة ونظفيها كويس من جوه ومن بره واغسليها بالمية وبالملح والدقيق والليمون وبعد كده اغسليها بالمية وبعد كده حطيها في المصفاة علشان تصفي كل المية اللي فيها. 5- بعد كده هاتي شوكة واغرسي بيها جسم البطة في أماكن مختلفة بعد كده ادهني قلب البطة بالملح والفلفل وابدئي في حشو قلبها بخلطة الفريك. 6- هاتي صينية الفرن وادهنيها سمنة وحطي فيها شرائح البصل المتبل بالملح والفلفل وورق اللاورا، وحطي عليهم البطة ورشي الملح والفلفل والبهارات على سطح البطة. 7- لو لقيتي إن فيه فريك باقي منك ممكن إنك تحطيه في ورق فويل وتلفيه كويس وتحطيه في صينية الفرن مع البطة. 8- ضيفي إلى الصينية كوباية مية دافية وغطي الصينية بالورق الفويل ودخليها الفرن على درجة حرارة متوسطة لمدة ساعة ونص. 9- بعد مرور الساعة ونص خرجي الصينية وشيلي من عليها الورق الفويل وسيبيها في الفرن لمدة نص ساعة كمان علشان وشها يحمر. 10- بعد مرور النص ساعة خرجيها وحطيها في طبق التقديم وزيني الطبق من على الأطراف بالبطاطس. طبق الحلو كنافة بالمكسرات  زي ما قمر الدين والبط المحشي من الأكلات الرئيسية على السفرة المصرية في مصر، كمان طبق الكنافة من الأطباق الرئيسية اللي بتلاقيها موجودة في كل بيت في رمضان، وعلى فكرة الكنافة لها أكتر من طريقة بس النهارده هننتهز فرصة وجود ياميش رمضان ونعمل الكنافة بالمكسرات، وإن شاء الله في الأيام اللي جاية نجيب طرق تانية كتير... ومش محتاجة إني أفكرك إنك بلاش تعملي أكتر من صنف حلويات كفاية صنف واحد بس وتعمليه على قد أفراد أسراتك أو على قد عدد أفراد العزومة علشان ما فيش حاجة تفيض وتترمي. المقادير:- • 1/ 2 كيلو كنافة • 1/ 4 كوباية زيت ذرة • 1/ 2 كوباية زبدة أو سمنة • 1/ 4 كوباية عين جمل أو جوز من غير قشرة • 1/ 4 لوز من غير قشرة • 1/ 4 كوباية بندق من غير قشرة • 1/ 4 كوباية فستق من غير قشرة • 1/ 2 كوباية زبيب مقادير الشربات: • 1/ 2 كوباية سكر • 3/ 4 كوباية مية • عصير ليمون • فانيليا. طريقة عمل الشربات:- حطي السكر والمية كلهم مع بعض في إناء على نار هادئة لمدة ربع ساعة، بعد كده ضيفي الليمون وسيبيه لمدة 5 دقائق لغاية ما يغلي، بعد كده حطي الفانيليا وشيليه من على النار وسيبيه لغاية ما يبرد. طريقة عمل الكنافة:- 1- هاتي المكسرات اللي عندك كلها وحطيها كلها في كيس بلاستيك ودقي فوقه بإيد الهون علشان تكسري المكسرات إلى قطع صغيرة.. بعد ما تكسري المكسرات حطيها في طبق وضيفي إليها الزبيب وقلبيهم مع بعض كويس. 2- قطعي الكنافة، بعد كده حطيها في صينية فيها زبدة سايحة واخلطي الزبدة السايحة دي مع الكنافة كويس لغاية ما تلاقيها فعلاً اتشربت الزبدة كلها. 3- هاتي صينية تانية وادهنيها بالزبدة وحطي فيها نصف كمية الكنافة واضغطي عليها كويس بإيدك علشان تبقى متماسكة. 4- رشي المكسرات اللي عندك، بعد كده ضيفي النصف الباقي من الكنافة واضغطي عليها بإيديك كويس علشان تتماسك. 5- حطيها في فرن متوسط الحرارة، وسيبيها لمدة نص ساعة أو لغاية ما تلاقي وشها بقى لونه ذهبي ولو هتقدري إنك تقلبي الكنافة في نصف مدة الطهي مع إضافة 1/ 2 معلقة كبيرة زبد أو سمن في الصينية وتدخليها الفرن تاني (بعد ما تقلبيها)، وده علشان تبقى الكنافة لونها واحد من جميع النواحي، بعد كده خرجيها من الفرن وقطعيها على حسب الحجم اللي إنتِ عايزاه وصبي عليها الشربات البارد وبعد كده حطيها في طبق. وبكده تكون خلصت عزومتنا النهارده وياللا بسرعة على المطبخ علشان تلحقي تعمليها على الفطار وإلى اللقاء غداً إن شاء الله مع أطيب التمنيات بصوم مقبول وإفطار شهي بإذن الله سلااااااااام |
|
|
|
26-08-2009
|
رقم المشاركه : 3 |
|
|
عزومة 2 رمضان
عزومة 2 رمضان المشروب اللبن بالتمر  فيه ناس كتير بيحبوا إنهم يفطروا على البلح بالتمر، علشان كده جبنا لهم النهارده أحسن طريقة لعمل اللبن بالتمر وعلى فكرة كوب التمر باللبن دي مفيدة جداً جداً للجسم. المقادير:- • كيلو لبن • 5 معالق سكر "اختياري" • 1/4 كيلو بلح منزوع النوى ومقشر • 1/2 معلقة فانيليا أو نص معلقة قرفة "اختياري" الطريقة:- 1. انقعي البلح لمدة خمس ساعات في مية وبعد كده قشريه. 2. هاتي كوب كبيرة وحطي فيها اللبن البارد وضيفي ليه البلح والسكر وقلبيهم مع بعض كويس، وبعد كده ضيفي إليهم نصف معلقة الفانيليا أو نصف معلقة قرفة، وقلبيهم كلهم مع بعضهم كويس وبعد كده صبيهم في الكوبايات. طبق الشوربة شوربة البسلة  المقادير:- • كوب لبن • كوب شوربة فراخ أو لحمة • بصلة متوسطة مقطعة قطعاً صغيرة جداً • 1/4 كيلو بسلة • 3 أكواب مية • 1/2 1 معلقة كبيرة زبد • معلقة كبيرة دقيق • 1/4 حزمة بقدونس مقطعة قطع صغيرة الطريقة:- 1. هاتي البسلة واسلقيها كويس في المية لمدة ربع ساعة بعد ما تلاقيها استوت اطفي البوتجاز وصفيها من مية السلق وسيبيها لغاية ما تبرد. 2. حطي البسلة في الخلاط وضيفي إليها ربع كوب مية واضربيها في الخلاط كويس علشان تنعم، وبعد كده صفيها بمصفاة دقيقة. 3. هاتي حلة وحطي فيها الزبدة وبعد كده ضيفي إليها البصلة وقلبيها كويس لغاية ما لونها يبقي ذهبي.. بعد ما تلاقي إن لون البصلة بقى ذهبي ضيفي إليها الدقيق وباقي الزبدة، واستمري في التقليب لغاية ما الدقيق يبقى لونه ذهبي. 4. بعد ما تلاقي إن الدقيق لونه بقى ذهبي ضيفي إليه اللبن بالتدريج مع التقليب المستمر، وبعد كده ضيفي ليه المرقة والملح والفلفل والبسلة وقلبيهم كويس مع بعض، وسيبيهم مع بعض لغاية ما يغلوا وبكده إنت عملتي شوربة البسلة وقبل أذان المغرب بربع ساعة سخنيها تاني وصبيها في أطباق الشوربة. على فكرة ممكن إنك تضيفي شوية مية أثناء الغليان ده في حالة لو لقيتي إن الشوربة سمكية زيادة عن اللزوم. طبق السلطة سلطة البطاطس  • 4 ثمرات بطاطس مسلوقة ومقطعة مكعبات • 1/2 حزمة بقدونس مقطعة قطعاً صغيرة • 1/4 حزمة كرفس مقطعة قطع صغيرة • بصلة مقطعة قطع صغيرة • فصين ثوم مدقوقين ناعم • معلقة صغيرة فلفل • معلقة صغيرة ملح • ثمرة طماطم مقطعة قطع صغيرة • قرن فلفل أحمر مقطع قطع صغيرة الطريقة:- اخلطي كل المقادير مع بعضها وحطيها في طبق السلطة. الطبق رئيسي الريش البتلو بالخضروات  المقادير:- • كيلو ريش بتلو، أو ريش ضأن • بصلة كبيرة مقطعة شرائح • 1 ثمرة فلفل أخضر صغيرة مقطعة قطع صغيرة • 2 معلقة كبيرة عصير ليمون • 1/2 كوب بسلة • 3 ثمرات جزر • 3 ثمرات بطاطس • حزمة روزماري • 1 معلقة كبيرة بهارات • 1/2 كوب مية مغلية الطريقة:- 1. قطعي أوراق الروزماري، واخليطها بالفلفل الأخضر وعصير الليمون والملح والفلفل وقلبيهم مع بعض كويس وضيفي إليهم الريش وقلبيهم كلهم مع بعض وسيبيهم لمدة 3 ساعات علشان اللحمة تتبل كويس. 2. بعد مرور الـ 3 ساعات هاتي صينية الفرن وحطي فيها شرائح البصل ورصي من فوقها الريش، وضيفي ليهم باقي الخليط السابق اللي إنت عملتيه. 3. شغلي البوتجاز على نار متوسطة، وحطي الصينية على النار، وسيبيها لمدة 1/ 2 ساعة أو لغاية ما اللحمة تخرّج المية الموجودة فيها وتشربها تاني مع التقليب من وقت للتاني. 4. لما تلاقي اللحمة شربت المية بتاعتها ضيفي ليها 1/2 كوب مية مغلية وغطي الصينية وسيبيها على النار لمدة ساعة ونص كمان أو لغاية ما تلاقي إن اللحمة استوت. 5. بعد مرور ساعة من وجود اللحمة على النار اسلقي البسلة وقطعي الجزر والبطاطس قطع كبيرة، وضيفيهم إلى اللحمة بعد ساعة من مدة طهي اللحمة سيبيهم على النار لغاية ما الاتنين يستووا. 6. بعد ما اللحمة والخضار يستووا اغرفيهم في أطباق التقديم، ممكن مع الطبق ده إنك تعملي طبق رز أبيض أو طبق مكرونة. طبق الحلو قطايف بالمكسرات  المقادير:- • 1/2 كيلو قطايف عصافيري "صغيرة" • كوب بندق مجروش • كوب لوز مجروش • كوب سوداني مجروش • 1/2 كوب سكر • 1 معلقة كبيرة ماء زهر أو ماء ورد • زيت للقلي • شربات الطريقة:- 1. هاتي طبق واخلطي فيه البندق واللوز والسكر، وضيفي ليهم ماء الزهر أو الورد. 2. هاتي القطايف واحشيها معلقة كبيرة من خليط المكسرات اللي عندك، خدي بالك إن الحشو ده يكون في وسط قرص القطايف، واقفلي قرص القطايف بالضغط عليه بإديك، وخدي بالك إنك تتأكدي من عدم وجود أي حشو ظاهر. 3. بعد ما تخلصي حشو القطايف كلها هاتي طاسة وسخني فيها الزيت كويس، وبعد كده اقلي القطايف على درجة حرارة متوسطة، لغاية ما تلاقي إن لون القطايف بقى ذهبي شيليها من الزيت وحطيها في الشربات، وبعد كده طلعيها من الشربات وحطيها في مصفاة علشان تتخلصي من الشربات الزيادة، وبعد كده حطيها في طبق الحلويات. ودي كمان طريقة عمل شربات القطايف.. مقادير الشربات: • 1/2 كوب سكر • 3/4 كوب مية • عصير ليمونة • فانيليا طريقة عمل الشربات: حطي السكر والمية كلهم مع بعض في إناء على نار هادئة لمدة ربع ساعة، وبعد كده ضيفي الليمون وسيبيه لمدة 5 دقائق لغاية ما يغلي، وحطي الفانيليا وشيليه من على النار وسيبيه لغاية ما يبرد. وبكده تكون خلصت عزومتنا النهارده وياللا بسرعة على المطبخ علشان تلحقي تعمليها على الفطار وإلى اللقاء غداً إن شاء الله مع أطيب التمنيات بصوم مقبول وإفطار شهي بإذن الله سلااااااااام |
|
|
|
26-08-2009
|
رقم المشاركه : 4 |
|
|
رد: وجبات رمضانية ... 30 وجبة ل30 يوم
كل الشكر لك على الوجبات المتميزة وكل عام والجميع بخير تقبلوا فائق احترامى واسعد الله ايامكم بكل الخير |
|
|
|
26-08-2009
|
رقم المشاركه : 5 |
|
|
عزومة 3 رمضان
عزومة 3 رمضان العصيرعصير البرتقال والليمون  ده بقى عصير مفيد جداً؛ لأنه مليان فيتامينات مفيدة للجسم، وكمان بيساعد على الهضم. المقادير:- • 1/4 كيلو برتقال • 1/2 كوب سكر • عصير ليمونة • مكعبات ثلج "اختياري" الطريقة:- اعصري البرتقال، وضيفي إليه عصير الليمون والسكر وقلبيهم مع بعض كويس، وبعد كده دخّليه الثلاجة، وقبل أذان المغرب بربع ساعة خرجيه وصبيه في كأسات العصير وضيفي ليه مكعبات التلج. طبق السلاطة سلطة الطحينة الحارة  المقادير:- • كوب طحينة • 4 فصوص ثوم • 1/2 كوب لبن • عصير ليمونة • قرن فلفل أحمر حار • 2 معلقة كبيرة زيت ذرة • ملح وفلفل • 1/2 فنجان مية دافية • 1/2 معلقة كمون مطحون • أوراق بقدونس "للتزين" • حمص "للتزيين" الطريقة:- 1. اطحني الثوم مع الفلفل الأحمر، ومعاهم الملح والفلفل كويس لغاية ما تلاقيهم بقوا ناعمين قوي، بعد كده هاتي طبق السلاطة، وحطي فيه الطحينة، وضيفي ليها باقي المكونات دي ما عدا الزيت وابدئي في خلطهم كلهم مع بعض كويس؛ بحيث ما يكونش فيه أي حاجة مكلكعة. 2. بعد ما تتأكدي إن ما فيش أي حاجة مكلكعة والخليط بقى ناعم، ضيفي إليه الزيت من على الوش ومعلقة الكمون المطحون وأوراق البقدونس من على الجنب للتجميل. طبق الشوربة شوربة الخضار والفراخ والمشروم  المقادير:- • 1/4 كيلو صدور فراخ مقطعة قطع كبيرة ومسلوقة • 3 بصلات مقطعة قطع صغيرة جداً • 1 كوب لبن حليب • 3 أكواب شوربة فراخ • كوب دقيق • 1/4 كيلو مشروم مقطع شرائح • 3 ملاعق كبيرة زبدة • عصير ليمونة • 1/2حزمة بقدونس مقطعة قطعاً صغيرة • فلفل وملح • 3 أكواب خضار مشكل ومقطع مكعبات صغيرة (جزر - بسلة - بطاطس - جزر) الطريقة:- 1. سيّحي الزبدة على النار، وبعد كده ضيفي إليها البصل مع استمرار التقليب لغاية ما لون البصل يبقى ذهبي. 2. لما تلاقي إن لون البصلة بقى ذهبي ضيفي إليها الدقيق، مع استمرار التقليب لمدة خمس دقائق أو لغاية ما الدقيق يحمرّ. 3. بعد مرور الخمس دقائق ضيفي إليه اللبن تدريجياً مع التقليب المستمر علشان الدقيق ما يكلكعش. 4. بعد كده ضيفي شوربة الفراخ مع استمرار التقليب لغاية ما تلاقي إن العجينة بقت متجانسة وسميكة ومش مكلكعة ضيفي إليها الخضار والمشروم. 5. سيبي الخليط علي النار لمدة ربع ساعة، وبعد كده ضيفي إليه عصير الليمون والبهارات والملح وسيبه على النار لمدة ربع ساعة كمان أو لغاية ما تلاقي الخضار والمشروم استوى، اطفي البوتجاز وحطي الشوربة في أطباق التقديم وزيني الأطباق بالبقدونس. الطبق الرئيسي سمك مشوي في الفرن  من الأطباق المشهورة والخفيفة على المعدة في رمضان هو طبق السمك المشوي، ودي أحسن طريقة لعمل أكلة سمك مشوية لذيذة. المقادير:- • كيلو سمك بوري أو بلطي متوسطة الحجم • بصلة كبيرة مقطعة قطعاً صغيرة • 3 جزرات مقطعة قطعاً صغيرة • 2 حبة فلفل أخضر مقطعة قطعاً صغيرة • ملح/ فلفل/ كمون • 5 فصوص ثوم مفرومين • معلقتين زيت ذرة • 1/4 كيلو ردّة • عصير 3 ليمونات • أوراق جرجير "للتزيين" • شرائح ليمون "للتزيين" الطريقة:- 1. هاتي السمك، واغسليه كويس، وبعد كده ادهينه من برة ومن جوة بعصير الليمون. 2. اخلطي عصير الليمون مع الثوم مع البصل مع الجزر مع الفلفل مع الملح والفلفل والكمون كويس، وبعد كده احشي بيهم قلب السمك وسيبيه لمدة نص ساعة علشان يتبل كويس، بعد مرور النص ساعة رشي على ظهر السمك ردة، واشويه في فرن البوتجاز أو على الشواية. 3. بعد ما السمك يستوي حطيه في أطباق التقديم، وزيني الطبق بشرائح الليمون وأوراق الجرجير. طبق الحلو كنافة بالقشطة  وعدتكم قبل كده إني أقدم لكم أكتر من طريقة لعمل الكنافة النهارده جبت لكم طريقة عمل الكنافة بالقشطة.. المقادير:- • 1/2 كيلو كنافة • كوب سمن مقادير القشطة:- • 3 أكواب لبن حليب • 5 ملاعق كبيرة دقيق • كوب قشطة مقادير الشربات:- • 1/2 كوب سكر • 3/4 كوب ماء • عصير ليمونة • فانيليا طريقة عمل الشربات:- حطي السكر والمية كلهم مع بعض في إناء على نار هادئة لمدة ربع ساعة، بعد كده ضيفي الليمون وسيبيه لمدة 5 دقائق لغاية ما يغلي، حطي الفانيليا وشيليه من على النار وسيبيه لغاية ما يبرد. طريقة تحضير القشطة:- دوّبي اللبن مع الدقيق مع بعض، بعد كده حطيهم في إناء على النار وقلبيهم كويس لغاية ما تلاقي الخليط بدأ يتماسك، بعد كده شيليه من على النار، وضيفي ليه القشطة وقلبيه كويس لغاية ما تلاقي الخليط بدأ يتجانس، بكده تبقى القشطة جاهزة. طريقة عمل الكنافة:- 1. هاتي الكنافة وقطعيها كويس وبعد كده افركيها بالسمن السايح، بعد كده هاتي صينية وادهنيها بالسمنة، وبعد كده حطي نصف مقدار الكنافة في الصينية مع الضغط عليها كويس بإيديك أو باستخدام صينية أخرى، وده علشان الكنافة ما تكونش هايشة في الصينية، بعد كده رشي شوية سمنة فوقها وشوية قشطة من اللي إنتِ عاملاها، بس خدي بالك إنك تبعدي عن الأطراف.. 2. بعد كده ضيفي النصف الباقي من الكنافة واضغطي عليها زي المرة اللي فاتت، ورشي فوقها شوية سمنة علشان الوش يحمر، وبعد كده دخليها الفرن على نار هادية.. بعد ما تلاقيها استوت خرجيها من الفرن، ورشي عليها الشربات اللي إنتِ عملتيه، وسيبيها لغاية ما تبرد، وبعد كده قطعيها وقدميها. وبكده تكون خلصت عزومتنا النهارده وياللا بسرعة على المطبخ علشان تلحقي تعمليها على الفطار وإلى اللقاء غداً إن شاء الله مع أطيب التمنيات بصوم مقبول وإفطار شهي بإذن الله سلااااااااام |
|
|
|
26-08-2009
|
رقم المشاركه : 6 |
|
|
عزومة 4 رمضان
عزومة 4 رمضان العصير زبادي بالأناناس  المقادير:- • كوب زبادي منزوع الدسم • كوب عصير أناناس • 1معلقة صغيرة فانيليا • كوب مية كبير • 4 مكعبات ثلج "اختياري" الطريقة:- اضربي كل المكونات دي مع بعضها في الخلاط، وبعد كده صبيها في كأسات العصير، وضيفي إليها مكعبات الثلج. طبق الشوربة شوربة الفاصوليا البيضا بالخضار  فيه ناس كتير ما بتحبش تأكل الفاصوليا البيضا دي على الرغم إن ليها أهمية غذائية كبيرة؛ فإيه رأيك لما تجربي تعملي منها شوربة طعمها هيبقى أحلى وأحلى، ودي الطريقة.. المقادير:- • 1/2 كوب فاصوليا بيضا • كوب بطاطا أو بطاطس مقشرة ومقطعة مكعبات متوسطة الحجم • 1 ثمرة فلفل أخضر مقطعة قطع متوسطة الحجم • 1 ثمرة فلفل أحمر مقطع قطع متوسطة الحجم • 1 ثمرة جزر مقطعة قطعاً متوسطة الحجم • 3 معالق سمنة أو زيت • 3 أكواب مية + مكعب مرقة دجاج"اختياري" • 3 أكواب شوربة فراخ أو لحمة • ملح وفلفل • أوراق بقدونس للتجميل الطريقة:- 1. هاتي الفاصوليا وانقعيها في مية لمدة يوم أو اسلقيها في المية، وبعد كده اغسليها كويس بمية باردة وحيطها في المصفاة. 2. هاتي صينية وحطي فيها السمنة أو الزيت، وبعد كده ضيفي الفاصوليا وباقي الخضار، وقلبيهم مع بعض كويس، وبعد كده ضيفي إليهم باقي المقادير، وسيبيهم على النار لغاية ما الخضار والفاصوليا تستوي، اغرفي الشوربة في طبق الشوربة وجمليها بأوراق البقدونس. طبق السلطة الحمص بزيت الزيتون  المقادير:- • كوب حمص جاف • 1/2 كوب زيتون أسود مقطع شرائح • بصلة مقطعة قطعاً صغيرة جداً • 2 معلقة طعام أوراق كزبرة، مفرومة فرماً ناعماً • فص ثوم مدقوق مع معلقة ملح • 1/8 معلقة صغيرة فلفل أحمر مطحون • 1 معلقة طعام زيت زيتون • 2 معلقة عصير ليمون الطريقة:- 1. هاتي الحمص واغسليه كويس وبعد كده انقعيه في المية لمدة 5 ساعات. 2. بعد مرور الخمس ساعات هاتي الحلة واغلي فيها الحمص بس خدي بالك إن النار تكون متوسطة الحرارة، سيبي الحمص على النار لمدة ساعتين أو لغاية ما تلاقي إن الحمص بقى طري. 3. صفي الحمص من المية وسييبه لغاية ما يبرد، وبعد ما يبرد ضيفي إليه باقي المقادير وقلبيهم مع بعض كويس، واضربيهم كلهم مع بعض في الخلاط، حطي الخليط السابق في طبق السلاطة، ورشي عليه من على الوش زيت الزيتون. الطبق الرئيسي فراخ محشية أرز وخضروات  المقادير:- • 1/2 كوب أرز • 1/2 كوب بسلة • جزرة مقطعة قطعاً صغيرة • 1/2 حبة فلفل أخضر مقطعة قطعاً صغيرة • 1/2 حزمة بقدونس مقطعة قطعاً صغيرة • معلقة كبيرة زبدة أو 2 معلقة كبيرة زيت • بصلة متوسطة • معلقة كبيرة نعناع أخضر • 2 معلقة صغيرة زعتر أخضر أو جاف • 2 معلقة كبيرة زيت ذرة • بصلة مقطعة شرائح • 1 معلقة صغيرة ثوم مفروم الطريقة:- 1. اغسلي الفرخة كويس قوي من جوه ومن بره، وادعكيها من جوه ومن بره بالملح والليمون وبعد كده اغلسيها كويس بالمية، وسيبيها في المصفاة علشان تنشف. 2. افرمي البصلة مع الجزرة مع الفلفل مع البقدونس مع النعناع كويس قوي. 3. هاتي صينية وسخني فيها الزيت على نار هادية، وبعد كده ضيفي ليه مزيج الخضروات وقلبيه لمدة خمس دقائق، وبعد كده ضيفي ليه البسلة والأرز والملح والفلفل، وقلبيهم مع بعض لمدة عشرة دقائق وبعد كده اطفي البوتاجاز. 4. هاتي الفرخة واحشيها بالخليط السابق بس خدي بالك إنك ما تمليهاش قوي علشان الرز بيزيد، وهو بيستوي بعد ما تخلصي حشوها اربطي رجليها. 5. سخني الفرن إلى درجة حرارة متوسطة واخلطي الزبدة بالثوم والملح والفلفل، وادهني بيهم الفرخة من جميع الجوانب ورشي عليهم من على الوش زعتر. 4. هاتي صينية الفرن وحطي فيها شرائح البصل المتبل بالملح والفلفل وحطي الفرخة وضيفي إليهم المية لتغطي ثلث طول الدجاجة فى الصينية. 5. غطي الصينيه بورق فويل وحطيها في الفرن لمدة ساعتين، وبعد كده خريجها، وشيلي الورق ودخليها تاني لمدة نص ساعة كمان علشان الفرخة تحمرّ من جميع الجوانب. طبق الحلو أم علي  المقادير:- • 5 أكواب لبن حليب مُحلى • 5 رقائق جلاش • 2 معلقة كبيرة زبد • 3 معالق كبيرة كريمة لباني • 1/2 كوب زبيب • 1/4 كوب بندق • 1/4 كوب لوز الطريقة:- 1. حطي الجلاش على صاج أو صينية للفرن وحمصيه في فرن. 2. هاتي البندق واللوز وحطيهم على صاج أو صينية للفرن، وحمصيهم في الفرن لمدة 4 دقائق. 3. في الوقت اللي إنتِ بتحمصي فيه المكسرات سخني اللبن. 4. قطعي رقائق الجلاش إلى قطع متوسطة وحطيها في طاجن كبير، وضيفي ليها البندق واللوز والزبيب، وبعد كده حطي اللبن في الطاجن. 5. سخني الفرن حتى درجة حرارة متوسطة (200 مئوية). وحطي الطاجن في الفرن لمدة 15 دقيقة أو لغاية ما تلاقي إن الرقائق بدأت في امتصاص اللبن. 6. خرجيه من الفرن وضيفي إليه الزبدة والكريمة من على الوش، ودخليه الفرن تاني لمدة 20 دقيقة أخرى أو لغاية ما تلاقي لونه بقى ذهبي خرجيه. وبكده تكون خلصت عزومتنا النهارده وياللا بسرعة على المطبخ علشان تلحقي تعمليها على الفطار وإلى اللقاء غداً إن شاء الله سلااااااااام مع أطيب التمنيات بصوم مقبول وإفطار شهي بإذن الله |
|
|
|
26-08-2009
|
رقم المشاركه : 7 | |||||||||||||||||||||||
|
|
رد: وجبات رمضانية ... 30 وجبة ل30 يوم
وانت طيب وبكل خير وبكامل السعادة ضوءنا نورت الموضوع بس ما تمد ايدك على اى عصير هنا ده للعرض فقط وللشرح ماشى ؟؟؟؟ هههههههههههههههههه نورت الموضوع ويا ريت تتابع معانا باقى الوجبات وتجربها وتقول رأيك فيها وكل عام وانت الى الله أقرب وعلى طاعته أدوم |
|||||||||||||||||||||||
|
|
|
26-08-2009
|
رقم المشاركه : 8 |
|
|
عزومة 5 رمضان
عزومة 5 رمضان العصير عصير الموز باللبن واللوز  إيه رأيك لما تعملي النهارده عصير موز باللبن واللوز؟! المقادير:- • 1/4 كيلو موز • 3 أكواب لبن حليب بارد • 1/4 كوب لوز أبيض منزوع القشور ومبشور • 3 ملاعق سكر • عصير ليمونة الطريقة:- اخلطي كل المقادير دي مع بعضها واضربيهم كلهم مع بعضهم في الخلاط الكهربائي، وبعد كده حطيهم في كوبيات العصير. طبق الشوربة شوربة الجزر  النهارده هنستفيد من الجزر في عمل طبق شوربة في منتهى الجمال ودي الطريقة... المقادير:- • 1/2 كيلو جزر • 2 حبة بطاطس كبيرة • 1 معلقة كبيرة بقدونس مفروم • 1 معلقة كبيرة زبد • شوربة فراخ أو لحمة أو مرقة دجاج + كوب مية • بصلة مقطعة قطعاً صغيرة الطريقة:- 1. هاتي الجزر والبطاطس واغسيلهم كويس وقشريهم، وبعد كده قطعيهم إلى قطع صغيرة. 2. هاتي حلة وحطي فيها الزبدة، وحمّري فيه البصل والجزر والبطاطس على نار منخفضة لمدة 15 دقيقة مع التقليب المستمرّ. 3. بعد مرور الربع ساعة ضيفي إليهم الشوربة والملح والفلفل، وسيبيهم لغاية ما يغلوا وتلاقي الجزر والبطاطس بقت لينة. بعد كده اطفي البوتجاز، وسييبها لغاية ما تبرد، وبعد كده اضربيهم مع بعض في الخلاط. 4. بعد ما تضربيهم في الخلاط هاتي الحلة وحطيهم على النار، وسخنيهم مرة كمان، وبعد كده صبيهم في أطباق الشوربة، وزيني الطبق بالبقدونس المفروم، وعلى فكرة ممكن لو لقيتي قوام الشوربة سميك ممكن إنك تضيفي المية السخنة أثناء الغليان في المرة الثانية. طبق السلاطة سلاطة الفلفل المشوي بالبقدونس  المقادير:- • 1 ثمرة فلفل أحمر متوسطة الحجم • 1 ثمرة فلفل أخضر متوسطة الحجم • 1/4 معلقة صغيرة فلفل أسود • 1 ثمرة فلفل أصفر متوسطة الحجم • نص حزمة بقدونس "للتزيين" • 4 فصوص ثوم مفرومين الطريقة:- 1. هاتي الفلفل واغسليه كويس، وبعد كده نشّفيه واشويه على نار متوسطة الحرارة مع تقليبه من جميع الجوانب. 2. بعد ما يشوى الفلفل سيبيه لغاية ما يبرد، وبعد كده قشريه، وشيلي البذر منه، وبعد كده قطعيه إلى قطع صغيرة. 3. هاتي طبق السلطة وحطي فيه الفلفل المقطع وتبليه بالملح والفلفل الأسود والثوم ممكن إنك تزيني الطبق بالبقدونس. الطبق الرئيسي مكرونة اسباجيتي بالفراخ المشوية  المقادير:- • نص كيلو مكرونة اسباجيتي • نصف كيلو صدور فراخ مشوية ومقطع شرائح بالطول • فلفل ألوان مقطع شرائح بالطول • 3 ملاعق كبيرة زيت الزيتون • 3 فصوص ثوم مهروس • نصف كوب جوز مدقوق • ربع كوب جبنة تشيدر مبشورة مقادير الصلصة:- • 3 ملاعق كبيرة ريحان مجفف • 2 معلقة كبيرة زيت الزيتون • فص ثوم مهروس • نصف كوب جبنة بارميزان • نص كباية زيت ذرة الطريقة:- 1. اسلقي المكرونة في مية سخنة مضاف ليها الملح ونص معلقة زيت، بعد ما المكرونة تتسلق كويس اغسليها بمية باردة، وسيبيها في المصفاة. 2. بعد كده ابدئي في تحضير الصلصة بإنك تحطي كل مكوناتها في الخلاط وتضربيهم مع بعض كويس. 3. هاتي صينية وسخني فيها زيت الزيتون، وحمري الثوم ثم اضيفي ليها الفراخ مع الصلصة المعدة سابقاً وقلبيهم مع بعض لمدة 5 دقيقة، وبعد كده ضيفي المكرونة ونصف كمية الجوز، واتركيها لمدة 4 دقائق على النار. 4. شيلي المكرونة من على النار وحطيها في طبق التقديم وزينيها بباقي الجوز والجبنة المبشورة. طبق الحلو مهلبية قمر الدين  المقادير:- • نصف لفة قمر الدين • كباية كبيرة سكر • 6 أكواب مية • كباية نشا • كباية من اللوز المقشّر (أو أي مكسرات موجودة) الطريقة:- 1. انقعي قمر الدين مدة ليلة كاملة في المية. 2. بعد ما تلاقي قمر الدين ذاب في المية هاتي حلة وصبيه فيها، وضيفي إليه كباية مية كبيرة وسكر مع التقليب، وحطي حلة قمر الدين دي على النار مع التقليب المستمر... 3. أثناء غليان قمر الدين على النار هاتي كباية مية وحطي فيها النشا وقلبيهم كويس... 4. بعد ما قمر الدين يغلي ضيفي إليه النشا تدريجياً مع التقليب المستمر، وخدي بالك إن في الوقت ده تخلي النار هادية علشان تقدري إنك تتحكمي فيه، وسيبيه على النار لمدة نص ساعة مع التقليب المستمر علشان ما يلزقش. 5. بعد ما تلاقي قمر الدين بقى سميك شيليه من على النار وصبيه في أطباق صغيرة واستني عليه لما يبرد، وبعد كده زينيه باللوز المقشر أو أي مكسرات عندك ودخليه التلاجة وطلعي منه وكلي. وبكده تكون خلصت عزومتنا النهارده وياللا بسرعة على المطبخ علشان تلحقي تعمليها على الفطار وإلى اللقاء غداً إن شاء الله مع أطيب التمنيات بصوم مقبول وإفطار شهي بإذن الله سلااااااااام |
|
|
|
27-08-2009
|
رقم المشاركه : 9 |
|
|
عزومة 6 رمضان
عزومة 6 رمضان العصير عصير جوافة بالليمون  المقادير:- • 1/4 كيلو جوافة • مية • سكر • عصير ليمونة • ورقة نعناع "للتزين" الطريقة:- هاتي الجوافة واغسيلها وقطعيها قطع صغيرة، بس خدي بالك إنك تشيلي منها البذر، حطيها في الخلاط وضيفي إليها المية وعصير الليمون والسكر واضربيهم مع بعض كويس، بعد كده صبيها في أكواب العصير. طبق السلاطة سلاطة خضراء  المقادير:- • 1 حبة خس متوسطة • حبة طماطم • 1 حبة خيار • 1 حبة جزر • 1 حبة فلفل أصفر • بصلة • زيت الزيتون • ملح • عصير ليمونة الطريقة:- قطعي كل المقادير دي كلها مع بعضها واعصري عليهم الليمون وضيفي إليهم الملح وزيت الزيتون وحطيهم في طبق السلاطة. طبق الشوربة شوربة المأكولات البحرية بالليمون  المقادير:- • ربع كيلو سمك فيليه مقطعاً قطعاً صغيرة • ربع كيلو جمبري • ربع كيلو سبيط "اختياري" • كرات • كرفس • بصـل • ثـوم • عصير ليمون • ملح / فلفل أسود/ قرنفل/ حبهان الطريقة:- 1. نظفي السمك والجمبري والسبيط كويس واغسليهم كويس، وبعد كده اسلقيهم في حلة عميقة مع الكرات والكرفس والبصل المقطع والحبهان والقرنفل. 2. خدي بالك وأنت بتسلقي السمك أنك تشيلي الريم أول بأول، بعد كده ضيفي الملح والفلفل الأسود والثوم المفروم والبقدونس، وخليه يغلي على نار هادئة لمدة نص ساعة. 3. بعد مرور نص ساعة صبي الشوربة في أطباق الشوربة، وللتجميل ممكن إنك تضيفي البقدونس المفروم وترشي عليـها عصير ليمون. الطبق الرئيسي جمبري مقلي بالجبنة  المقادير:- • 2 بيضة مخفوقة • 1 معلقة كبيرة بقدونس مفروم ناعم • كوب جبنة رومي مبشورة • زيت ذرة للقلي • كوب دقيق • كيلو جمبري مقشر • ملح وفلفل • كوب بقسماط • 2 معلقة صغيرة ثوم مفرومة الطريقة:- 1. اغسلي الجمبري كويس وبعد كده حطيه في مصفاة وسيبيه علشان يصفي المية. 2. هاتي فصوص الثوم وقرن فلفل أحمر مقطعاً قطعاً صغيرة، وحطيهم في الهون ومعاهم الملح والكمون والبهارات، واطحنيهم كويس مع بعض.. بعد كده ضيفي إليهم الليمون وقلبيهم مع بعض ومعاهم الجمبري، وقلبيهم مع بعض كويس ، وسيبيه لمدة ساعتين علشان يتبّل كويس. 3. حطي الدقيق في طبق، وفي طبق آخر اخلطي البقسماط والجبنة، وحطي البيض في وعاء ثالث، وضيفي إليهم نص معلقة ملح وفلفل واخفقيه كويس. 4. بعد مررور ساعتين وبعد ما الجمبري يتبل اغمسي الجمبري في الدقيق ثم البيض، وبعد كده في مزيج البقسماط والجبنة وغطيه وحطيه في التلاجة لمدة 15 دقيقة. 4. سخني الزيت كويس، وبعد كده حمّري الجمبري في الزيت لغاية ما لونه يبقى ذهبي، حطيه في ورق التقديم وزيّني الطبق بالبقدونس وقطع الليمون. طبق الحلو خشاف الفواكه المجففة  المقادير:- • 1/4 كيلو بلح • 1/4 كيلو تين مجفف • 1/4 كيلو مشمشة • 1/4 كيلو قراصيا • 1/2 فنجان سكر • كوب كبير مية مغلية • 1/2 كوب زبيب • 1/2 كوب بندق مقشر • 1/2 كوب لوز مقشر الطريقة:- 1. هاتي البلح واقسميه إلى نصين وشيلي منه النوى. 2. هاتي التين واقسميه إلى نصين. 3. حطي البلح والتين في كوب فيه مية مغلية، وضيفي إليه السكر وقلبيه كويس، بعد كده سيبيه لمدة ساعة أو لغاية ما المية تبرد. 4. بعد كده ضيفي إليه البندق واللوز والزبيب، وقلبيهم مع بعض كويس، وسيبيهم في التلاجة لمدة ساعة، وبعد كده طلعيهم وحطيهم في أطباق الخشاف. وبكده تكون خلصت عزومتنا النهارده وياللا بسرعة على المطبخ علشان تلحقي تعمليها على الفطار ... واستنينا بكرة في عزومة جديدة وإلى اللقاء غداً إن شاء الله مع أطيب التمنيات بصوم مقبول وإفطار شهي بإذن الله سلااااااااام |
|
|
|
28-08-2009
|
رقم المشاركه : 10 |
|
|
رد: وجبات رمضانية ... 30 وجبة ل30 يوم
الفطار اليوم عند حبيبتي قلب عايزة كل الاكلات دي في يوم وااااااااااااحد تسلم الأيادي والله موضوع قمة في التميز وفرتي علينا عناء التفكير لكل يوم دمتي متالقة حبيبة قلبي |
|
|
| |
| مواقع النشر |
| العبارات الدلالية |
| رمضانية, ل30, وجبات, وجبة, يوم |
| أدوات الموضوع | |
|
|
المواضيع المتشابهه
|
||||
| الموضوع | كاتب الموضوع | المنتدى | مشاركات | |
| خطة بسيطة ... للتخلص من سموم الجسم في سبعة أيام | محمد فضل | صحتك بالدنيا | 1 | |
| استضافه مطار الخور بحضور نخبة من الهواة والمحترفين ...يوم الطيران المفتوح منصة مثالية | محمد فضل | منتدى الطائرات | 0 | |
أنت غير مشترك في حلم عابر. للتسجيل الرجاء اضغط هنـا
